Croes: Sergeant strook riba rotonde Cumana ta poni temporalmente

ORANJESTAD – E situacion di trafico na rotonde di Cumana ta mustra hopi complica aworaki tanto manera e ta traha, como e situacion di trafico manera cu e liñanan ta pinta. Pero, segun director di DOW Marlon Croes, tur esaki tin su motibo. Den un entrevista exclusivo na NoticiaCla, Croes a duna un bista di kico tur ta pasando cu e rotonde aki y mas ainda, e asunto rond di henter e proyecto miyonario di Watty Vos Boulevard. Y den e splicacion, e confusion crea pa e strepinan ‘straño’ riba e rotonde. Tur cos a haya splicacion. 

CONFUSO

Hopi siman NoticiaCla ta cubriendo e aspect confuso di e rotonde aki, ( y gran parti di e proyecto) cuestionando hopi parti cu ta mustra confuso. Director di DOW, Marlon Croes den su prome reaccion a admiti culpa pa cierto falta di publicidad riba e aspecto aki,( pasobra otro aspectonan semper a haya publicidad amplio) pero mes momento a clarifica gran parti (si no ta tur cos) di e situacion cu te cu awe, tabata parse confuso. Incluyendo e parti di liñanan riba e rotonde na Cumana. 

LIÑA STRAÑO RIBA ROTONDE

Entre e confusionan registra pa NoticiaCla, tabatin e momento con e contratista di e proyecto, Mota Engil a dicidi di ubica e asina yama ‘sergeant strepen’, e liñanan cu ta riba caminda cu ta forza un caminda pa bira mas small na cierto punto. E acto aki, sin cu a duna splicacion, a crea mas confusion den comunidad mirando cu ta netamente traha un rotonde pa amplia y percura pa fluho facil di trafico. Den e caso aki, a stroba esaki y ta obliga e automobilista di sali di dos liña na e rotonde y usa solamente un liña. Despues, riba rotonde, a pinta un otro liña cu tabata diripiente termina na nada, confundiendo e automobilista ainda mas y creando peliger den trafico. Ora cu NoticiaCla a publica esaki, a nota cu esey tabata un preocupacion enberdad valido. Pero despues  atrobe e contratista a dicidi pa riba e rotonde tambe pone un sergeant strook, cu ta definitivamente reduci e caminda riba e rotonde. Esaki a haci e situacion aun mas confuso. 

LIÑA TEMPORAL

Segun Croes, berdad cu pa e falta di informacion duna, a crea un confusion mas pio ainda y a pidi su disculpa pa esey. Despues Croes a splica cu e liñanan actual ta temporal, y lo wordo kita unabez e trabou completo ta cla. A mustra cu mester tene cuenta cu e aspect di seguridad di trafico durante e proyecto. Esaki ta algo cu lo tuma lugar mas den fin di otro aña. E rotonde manera cu el a wordo traha, ta cu un subida, y esey tin su motibo segun Croes. Parti di e proyecto ta pa conecta e rotonde cu e caminda cu ta sigui panort, y eynan lo tin un subida cu ta bira un viaducto pa pasa riba e caminda di Meiveld. Pues e subida di e  rotonde ta parti di e subida caba di e viaducto. Pero tanten cu e parti ey no ta cla, esta cu e caminda pa Meiveld tambe ta poni, e rotonde den e forma cu e ta awor si habri e caminda pa dos via manera cualkier otro rotonde, lo bira un problema  di trafico y consecuencia peligroso. Croes ta yame un ‘conflict moment’. Como tal, segun Croes, a opta pa ubica dos strook di sergeant, te ora cu e rotonde ta completamente cla y e ora lo kita e strooknan pinta y habri e rotonde pa su fluho normal manera cualkier rotonde.