Diferencia entre Bikker y Dowers riba e tema di atraco

ORANJESTAD – E minister di husticia di gabinete anterior Arthur Dowers a haye confronta dado momento cu un ola di atraco, y e minister actual Andin Bikker tambe ultimo dianan. E pregunta ta kico ta diferente awor compara cu antes, si corda cu e actual minister a cuestiona e minister anterior e tempo ey di su maneho relaciona cu atraco. Riba pregunta di NoticiaCla diaranson durante un conferencia di prensa, minister Bikker a sigura NoticiaCla cu e diferencia entre e y ex minister di husticia Arthur Dowers ta cu su  plan  (di Bikker) di combati crimen, ‘ta surtiendo efecto caba’. Pero despues, e mesun mandatario actual ta pidi pueblo pasenshi pa por keda cla cu e plan, pasobra esaki lo no ta cla ainda. Por lo menos e mandatario ta pidi tempo y pasenshi di comunidad pa por keda cla cu e plan. Esaki pasobra e kier diserti e plan di gobierno anterior y e maneho actual.

OLA DI ATRACO

Manera ta conoci, tin varios atraco a tuma lugar tras di otro ultimo dianan (3 den 24 ora), y esey tin pueblo preocupa. Tempo cu actual minister Bikker tabata parlamentario, el a critica e minister e tempo ey (Arthur Dowers)  riba e maneho di dje y cu el a te hasta sugeri cu e Dowers mester a tuma honor na su mes. Awe tin racha di atraco atrobe, y awor e mes ta na timon di husticia, pues kico a cambia? Segun Bikker, contrario na ora cu Dowers tabata bisa  pa ‘prepara pasobra ta bay tin hopi criminalidad’, su plan (di Bikker) si ta funcionando. E loke el a bisa ta cu lo intensifica control riba caya. 

E SITUACION

E mandatario de hecho a cuminsa e conferencia di prensa diaranson informando cu lo tin mas vigilancia visible strategico riba varios caminda na Aruba e proximo dianan aki , y cu e lo bay Parlamento diabierna pa pidi pa mas fondo pa por cubri e overtime cu lo mester bay paga polis pa e trabou extra. Tur esaki den cuadro di combatimento di criminalidad, specificamente e ola di atraco. Pero ta despues, e portal aki (NoticiaCla) a haci e pregunta, mirando cu aunke cu tin un minister nobo, atraconan ta sigui tras di otro y kier sa kico ta diferente awor. 

REACCION

E mandatario a mustra cu e cos ta diferente den sentido cu despues di basta siman di trankilidad tin un ola di atraco, y cu awor, di biaha nan (e gobierno aki) ta actuando. Ademas e ta mustra cu tempo di Dowers, e ex mandatario a bisa e tempo ey pa prepara pasobra ta bay tin hopi criminalidad. Algo cu segun Bikker, un minister di husticia no por sali y bisa.  “Mi kier men, come’on. E diferencia di opinion cu mi tabatin cune mi a bise ‘pero haloo, e ora bo a duna bo mes un brevet van onvermogen” Bikker a sigui bisa. E no por a compronde con e tempo ey cu como minister di husticia, Dowers por a bisa cierto cosnan publicamente. “A nos, manera cu algo sosode nos ta bin di biaha. Y nos plan manera mi a bisa, e ta surtiendo efecto caba. Awor tin un par di suceso” Bikker a sigui bisa, refiriendo na e atraconan. “Ami como minister di husticia nunca lo bisa ‘prepara pasobra tin high season di criminalidad’. 

DIFERENCIA DI MANEHO

Ora cu NoticiaCla a sigui insisti pa e mandatario contesta e pregunta specific esta di ki plan specific tin, Bikker a bisa cu ta imposibel pa un gobierno den 10 luna drecha loke a bay malo den 8 aña. E no a bay mas specifico riba e plan, pero a referi na e hecho cu si tabatin helicopter den halto, y radar funcionando, lo tabatin un miho control riba bo frontera. “E ta tuma tempo pa nos restaura esakinan, pero poco poco nos ta biniendo si, y ta pidi pueblo espacio un rato pa diserni kico tabata e maneho di e gobierno anterior, y efecto di gobierno actual y esey ta bay tuma su tempo. Scucha e minister riba e tema AKI.