Stellaris Casino hunto cu Camara di Comercio a organisa evento di “MiniBar”

ORANJESTAD - Diabierna ultimo Stellaris Casino hunto cu Camara di Comercio a organisa un MiniBar Event den cual a invita un cantidad grandi di entrepreneurnan hoben pa reuni bao di un solo dak. Durante e anochi aki a comparti y contagia otro cu energia, chispa, ideanan den forma di “networking”. Ta prome biaha cu Stellaris Casino ta uni cu Camara di Comercio pa e evento aki y ta consider’e un exito rotundo.

Yazira Javois-Feliciana, Director of Marketing & Slot Performance di Aruba Marriott & Stellaris Casino, tabata contento di mira y topa cu hopi ehecutivo hoben, directornan y tambe esunnan cu tin añanan di experiencia den "doing business" na Aruba presente na e evento. E idea di e evento tabata pa ehecutivonan por topa otro y haci negoshi. 

Pa Stellaris Casino, e tipo di eventonan asina aki ta hopi importante. Ta sinti cu ta contribui y ta stimula economia di Aruba, promoviendo mas inversion pa negoshinan sigui bay pa dilanti.

Kawish Misier di MiniBar Aruba, durante di e evento, a splica cu e meta ta pa stimula negoshi, mas comunicacion entre empresarionan, conoce otro mas ainda, pa haci negoshi cu otro. E anochi aki tabata un ‘full house’. Tabatin tur tipo di entrepreneur presente y un variedad di companianan di tur tipo di industria.

Segun Kawish Misier, ta logrando e meta y ta contento cu e resultado. Tabatin casi 80 persona, Crème de la Crème di Aruba cu tabata t’ey pa e evento di MiniBar. Ta prome biaha cu a haci'e bao di Camara di Comercio, pasobra na aña 2015 a organis’e caba, pa un total di 5 biaha, pero e tempo ey bao di YES Aruba.