Otro siman Cas di Cultura ta anfitrion di Congreso Arte di Tarima

ORANJESTAD – Den nos Aruba di awe nos mester busca metodonan con pa haci nos comunidad mas sano, vooral social y mentalmente. E metodo mas facil y placentero ta eynan mes: e practica di arte. Musica, baile, teatro, arte visual tur ta yuda desaroya mente y alma, ta forma sernan contento y cu miras mas positivo riba bida, cual tin un sin fin di efecto positivo riba comunidad. Ta kico mas nos kier? P'esey Cas di Cultura y Departamento di Cultura a formula e Congreso Arte di Tarima (Conference of the Performing Arts) pa scucha kico por haci aki mes cu ayudo di e generonan di arte pa yuda nos comunidad y individuonan bai dilanti. 

E CONGRESO ARTE DI TARIMA 12 di october ta conta cu 11 orado profesional, den diferente ramo di arte, di persona di gerencia pa docente te cu artista, tanto local como internacional, cu lo conta con nan ta anda cu nan ramo di arte y cultura y con esaki ta beneficia nan comunidad, tanto riba e area social, educativo, economico, creativo y comunitario. Mas cu tur cos den nos bida y situacion actual na Aruba, e potencial di arte mester wordo explora y uza. E dia lo tin hopi aliento y lo ta en general un dia agradabel, dunando hopi inspiracion. E ta pa tur persona interesa den arte y cultura, tanto cu ta practica activamente, pasivamente, docentenan, amateur, profesional y esnan trando tambe den e ramonan social. 

Registracion (bende carchi) ta habri via Facebook (jotform) di e dos instancianan, na Cas di Cultura y na Superfood. Riba dia 12 mes registracion ta habri 8am y e programa profesionalmente hinca den otro, lo cuminsa 8.45am te 4pm, incluyendo lunch y koffie pauze.

Tambe a organisa E CONCIERTO DI GALA dia 13 di oktober pa orguyosamente celebra e logro di 60 aña Cas di Cultura y 40 aña Departemento di Cultura. Esaki lo inclui al rededor di 45 artista y musico local cu ta ancioso pa presenta pa publico den esfera diferente cu custumber. E siere di e concierto ta den man di srta. Imara Thomas, soprano di opera Hulandes cu sanger Arubiano, trahando na Opera House na Dusseldorf. Imara ta gusta combina e genero clasico cu e genero pop, pues por spera un show di dje cu ta hopi varia. Despues di e concierto tin un momento placentero den cura cu un agrupacion musical y DJ. E anochi di espectaculo aki lo ta uno hopi agradebel, hasta pret, pa nunca lubida.

Cas di Cultura y Departamento di Cultura inmensamente gradicido na UNOCA, Prins Bernhard Cultuurfonds Caribisch Gebied, Vertegenwoordiging van Nederland op Aruba, Elite Productions, Subway, High Performance y Smit& Dorlas pa apoya e evenementonan aki y ta invita Aruba completo, amantenan di arte, cultura, positivismo y inovacion pa presencia e eventonan aki cu a ser formula y organisa cu hopi amor y dedicacion. Registracion (cumpra carchi) ta habri caba via Facebook di e dos instancianan, na Cas di Cultura y na Superfood. Pa mas informacion, e special pa educadornan y e mundo cultural of pa registra yama por yama 582-1010.