Fazio: Partnernan Strategico tabata esencial pa Proyecto di Expansion Gateway 2030

ORANJESTAD – Manera NoticiaCla a raporta dialuna caba, Aruba Airport Authority N.V. (AAA) oficialmente a firma e documentonan pa e financiamento cu tur prestador dialuna ultimo 1 di Oktober 2018 na Aeropuerto Internacional Reina Beatrix. 

Un prestamo total di AWG 495 miyon a wordo sera cu Vidanova Bank N.V. como e agente bancario, agente di seguridad y agente di pago representando tur e prestadornan cu ta: Stichting Algemeen Pensioenfonds Aruba (APFA), RBC Caribbean (RBC), CIBC FirstCaribbean (CIBC), Algemeen Pensioenfonds van Curaçao (APC), Caribbean Mercantile Bank N.V. (CMB), Aruba Bank N.V. (AB), Pan-American Life Insurance Company of Aruba (PALIG), FATUM Life Aruba N.V. (Fatum), Stichting Bedrijfspensioenfonds Aruba (SBA), Stichting Pensioenfonds Meta Bedrijven Aruba (MetaFund), Stichting Pension Fund Tourism Sector Aruba (SPTSA), y Stichting Fondo di Pensioen di Trahadornan di Empresanan y Fundacionnan Publico (FPEF). Tur prestador lo participa den e prome periodo di “bridge loan” di 5 anja pa despues un termino di 10 of 15 aña. 

Durante e proceso di financiamento di e ultimo lunanan e siguiente companianan tabata instrumental pa logra e meta importante aki: financeQUEST como e “Financial Arranger”; Brown Lawyers como e “Transaction Counsel” y Reliant Dutch Caribbean como e “Financial Consultant” riba e modelo financiero y business plan.

CEO di AAA Sr. James Fazio: “Partnernan Strategico tabata esencial pa yega e meta importante aki y nos ta hopi agradecido na tur prestador pa nan participacion y confiansa den e proyecto hopi importante pa nos isla. Nos ta cla pa e trabounan mes di construccion cuminsa y ta ansioso pa por yama bonbini na final di e proyecto na tur pasahero na un aeropuerto mas grandi, mas moderno y mas mihor.”