American Airlines lo opera buelo directo for di La Guardia, New York

ORANJESTAD/NEW YORK – Aruba Airport Authority N.V. (AAA) a wordo deleita cu e grato noticia  e siman aki door di un di su partnernan mas grandi den operacion di buelonan for di Merca, esta American Airlines. American Airlines a anuncia cu nan lo cuminsa opera un buelo semanal directo for di La Guardia Airport. E vuelo aki lo start dia 8 di Juni 2019 y lo cuminsa wordo bendi dia 8 di Oktober di e anja aki.

American Airlines ta un di e aerolineanan cu parti de e mercado di operacion for di Aeropuerto di Aruba mas grandi (18%) cu buelonan directo for di Aruba pa Miami, Philadelphia y Charlotte. American Airlines tambe lo bai opera buelonan semanal directo for di Dallas, Texas y Chicago, Illinois desde 22 december 2018 manera anuncia anteriormente. Awo cu e extra buelo aki for di La Guardia American Airlines lo bolbe tin un presencia den a aera di New York cu buelonan directo pa Aruba.

E buelonan pa Aruba lo wordo haci cu avionnan tipo Boeing 737-800 di 160 asiento. E schedule di buelo ta consisti di buelonan anual pa y for di La Guardia pa Aruba riba cada Diasabra. 

AAA su Chief Commercial Officer, Sra. Barbara Brown ta sumamente contento cu e anuncio aki di American Airlines: “E noticia aki ta fantastico! American Airlines semper a mustra di ta un partner grandi y loyal pa Aeropuerto di Aruba pa hopi anja y e servicio adicional aki ta prueba di un relacion duradero y creciente. Coneccion pa nos isla ta esencial pa nos industria di turismo y nos ta yama e servicio nobo aki bonbini cu brasanan habri!