Total di 400 persona na Aruba a haya formulario di UNHCR pa asilo

ORANJESTAD – Un total di 400 persona na Aruba a haya un document di un representante di UNHCR pa cu asunto di asilo politico segun premier Evelyn Wever. E mandatario a bisa cu awor lo bay atende cu e personanan aki pa splica e proceso y atende e asuntonan aki. Manera por corda, algun tempo pasa tabatin un confusion den comunidad pa loke ta e aspecto aki di duna formulario di asilo politico. Tabata conoci cu na Aruba un persona di UNHCR tabata otorga esaki na hendenan cu tabata solicita asilo politico. Esaki a crea un confusion y problema pa gobierno, ya cu nan ta esunan encarga pa otorga e status aki. 

MERCA

Durante e reunion recien na Merca (manera cu NoticiaCla a raporta recientemente caba), Wever a logra convence representantenan di UNHCR pa stop e acto di duna formulario aki di asilo politico. Segun Wever, UNHCR a priminti di lo stop cu e practica aki. A bisa cu a mustra cu tabata bou di impression eroneo cu Aruba no tabata structura pa por atende cu esaki. Algo cu segun Wever no tabata e caso.