FMSA: A test e calidad di jetfuel diahuebs como parti di operacion diario

ORANJESTAD – E compania responsabel pa e jetfuel na aeropuerto di aruba, Fuels Marketing & Supplies Aruba NV (FMSA) a sigura NoticiaCla diabierna cu nan test e calidad di jetfuel diahuebs como parti di operacion diario.  Manera indica diahuebs caba, e compania   a informa caba e dia ey cu fueling di avion for di diahuebs caba a sigi normal y diabierna tabata business as usual. Esaki despues cu a bin e noticia cu cos a bay ‘fout’ y cu varios avion no por a haya fuel debi na un irregularidad cu e tipo di jetfuel suministra. 

CONTAMINACION

Algun rato despues e compania a bin afo y refuta cualkier posibel contaminacion. Diabierna esey no a cambia“ Y tambe cu firmeza nos ta refuta cualkier alegacion cu fuel tabata contamina!” e representante di FMSA a ripiti na NoticiaCla diabierna. FMSA ta e compania na Aruba encarga cu abastecemento di jetfuel (gasoline pa avion), y desde 1985 bou di otro number y maneho di e companianan petrolero cu tabata estableci na Aruba anteriormente, a percura pa fuel tur avion na Aruba conforme e contract cu AAA.

TESTTa durante e testmento di fuel diahuebs, a bin determina cu algo no tabata corecto. Ora cu a puntra FMSA si e testnan di ayera (diahuebs) ta testnan cu ta haci tur dia of periodicamente, FMSA a contesta cu “e testnan ta den e practica di operacion diario, manera ta stipula den normanan di aviacion internacional”. Nan ta usa e tipo di jetfuel conoci como Jet A-1, y FMSA actualmente ta cumprando su fuel for di Citgo Petroleum Corp. origina di US Gulf Coast. 

E COMPANIA

E compania bou di number FMSA a lanta na October 2016 y tin un total di 38 empleado y ta abastece tur e 14 pompnan di gasoline cu gasoline y diesel na Aruba, y tambe  otro instancia manera den e caso aki, aeropuerto.