DCA: Ta investigando kico a bay robez diahuebs cu jetfuel na aeropuerto

ORANJESTAD – Un dia despues cu aeropuerto di Aruba a haye den un situacion fastioso cu asunto di jetfuel, departamento di aviacion civil ta investigando kico por a bay robez. Segun e director Edwin Kelly a splica NoticiaCla, “ta investigando e suceso den su totalidad”. Entre otro ken ta esun cu a check y a haya e fuel malo y con esey a sosode. Kelly pa motibo obvio no por a bay detayes di e investigacion. Segun Kelly, berdad cu tin avionan cu a keda afecta, pues cu e fuel a drenta den e tankinan di e avion. “  E mecanico di compania a sigui un procedura pa saca e awa for di e fuel bow supervision di Directie Luchtvaart” Kelly  a bisa, pero no a bisa cua avion. E pregunta miyonario mester haya un contesta unabez cu e investigacion caba, esta ‘con algo asina por a sosode’, segun Kelly. 

CONSECUENCIA

For di momento cu e caso a bira conoci, hopi tabata e comentario y preocupacion cu e impacto cu esaki por tin pa Aruba y su turismo. Tabata pensa den direccion cu e por afecta e confiansa cu Merca tin cu Aruba su situacion di avion, y cu algo asina por ta catastrofico. Pero Kelly a sigura e portal aki cu esey no ta e caso. “ No tin consequencia den e sentido ey” Kelly a sigui bisa. Segun e director, na tur pais rond mundo e calidad di fuel ta wordo gestest y medida ta wordo tuma si e test no sali bon. “ Aki tambe tur  instancia a haci nan trabow. Investigacion lo demonstra unda por mehora e sistema aun mas” Kelly a sigui bisa. El a mustra cu FMSA, e compania responsabel pa e fueling di e avionan, ta test e fuel regularmente. “Y e aerolineanan ta test e fuel segun spot check” e director a bisa finalmente. E investigacion a sigui awe y ta continua dialuna awor, pa despues bin cu un resultado cu lo tin cu bay analisa e ora. “E focus di e investigacion no ta pa apunta culpabilidad, sino pa haya sa concretamente kiko a pasa pa asina por evita cu e lo ripiti” Kelly a finalisa bisando.