Oduber: E pakico ta trahando yen di rotonde sin caba nan

ORANJESTAD – Por lo pronto, nos mester keda mira y experiencia e entre 7 pa 8 rotondenan nobo cu sea ta traha of ta den proceso pa wordo traha na Aruba y cu ta kedando den un forma ‘no acaba’ y ‘yen di bakinan oraño’ rond di nan. Asina minister di infrastructura Otmar Oduber a bisa NoticiaCla recientemente. A cuestiona e hecho cu ta trahando yen di rotonde pareu casi, pero no ta caba ningun y ta laga e bakinan oraño, sin cu lo ta necesario. Oduber a confirma cu enberdad e ta mahos y fastioso, pero mes momento tin su motibo. A opta pa traha nan y habri nan pa nan ta accesibel mas liher cu ta posibel bek pa trafico. Y na final di e proyecto (fin di otro aña), lo finalisa e rotondenan cu nan vegetacion y otro parti pa e keda cla y nechi. 

HOPI CRITICA

Pa hopi tempo caba tin critica di comunidad pa e forma con ta manehando e infrastructura di Aruba y con esaki ta obstaculisando trafico diario. Hende no por compronde pakico ta trahando yen di rotonde pareu, sin cu ta caba uno drechi. Segun Oduber, a traha prome tur e partinan cu no ta habita, pero dado momento mester a cuminsa traha e partinan cu ta conecta tur e camindanan (casi mitar di Aruba) cu otro pa medio di e rotondenan. Y un di e formanan mas facil pa haci esaki, ta traha nan pa nan ta operacional y practico, sin caba nan pero caba tur prome pa por conecta e camindanan. Despues lo finalisa esaki y tuma tempo pa drecha y haci e rotondenan bunita manera ta e caso cu tur otro rotonde. Esey lo tuma su tempo, mirando cu pa sigur e proximo 8 pa 10 luna lo tin trabounan cu tin cu tuma lugar. Pa mas sigur den curso di fin di otro aña por keda cla cu e proyecto unda cu e rotondenan tur lo haya nan buert final. 

BAKINAN NA E ROTONDE

Un otro critica cu tin ta cu si no tabata suficiente cu a rotonde nan no ta acaba, ta lagando e bakinan cora rond di tur e rotondenan cu ta mustra mas pio ainda y ta accentua cu nan no ta cla. Segun Oduber, e tambe a haci e pregunta ey y a compronde di KPA cu esey ta netamente pa motibonan di seguridad. Segun Oduber, ta polis a define esey, pasobra ta sinti cu si cuminsa habri e rotonde nan un tras di otro sin mas, autonan ta cuminsa core mas liher y cu tur e consecuencia cu esaki por trece cune. Sigur, si e trabou no ta cla ainda, cu pintamento di caminda, liña y e aspect infrastructural. Pues pa aworaki, e bakinan lo keda, te ora cu e rotondenan ta full cla y e proyecto entrega. Asina por lo menos e automobilistanan ta haya nan obliga di ‘slow down’ y asina evita accidente innecesario.