Kiwanis Club of Aruba tin ‘Dubai Wine Gala’ diasabra

ORANJESTAD - Kiwanis Club of Aruba tin su ‘Dubai Wine Gala’ diasabra anochi.  E famoso evento anual di recaudacion di fondo organisa pa Kiwanis Club of Aruba, cu su tema e aña aki “DUBAI WINE GALA” ta spera di ta un otro evento  fascinante cu lo surpasa tur espectativa.  E momento cu drenta den Renaissance Convention Center diasabra awor ta manera cu bo a yega Dubai mes. E motion graphic designer, Egmar Irausquin, cu ta e creative director na Elite, ta creando escenarionan di Dubai cu ta un experiencia unico. Esaki ta e prome biaha cu e ta creando un video mapping den Renaissance Convention Center.

Un tent estilo arabe lo ser instala tambe unda ta bay tin varios atraccion manera henna tattoo painting pa Eshita Asrani. E lo ta presente for di 9or pa 11or di anochi pa pinta gratuitamente pa esunnan cu ta desea. Bou mesun tent lo tin e virtual reality pa otro experiencia mas riba diasabra anochi.

Glamour, Elegancia y Sofisticacion lo keda refleha den su totalidad pa House of Mosaic Event Planners den e decoracion di DUBAI WINE GALA. Sigur nos por cataloga e ‘wine gala’ di Kiwanis Club of Aruba como un top evento unda cu tur e personanan cu cumpra un ticket, cu ademas di contribui pa un bon causa, ta bay experiencia un anochi fastuoso.

 E aña aki e bandanan cu lo comparti escenario ta e popular bandanan; N’Fusion, Buleria, Blue Boulevard hunto cu DJ Edson Tromp. Tambe lo tin un show exotico di belly dancers.  E “wine stations” asina gusta cu e seleccion di e miho biñanan di e diferente casnan, sigur e aña aki atrobe lo ta hopi bishita, mescos cu e “stations” cu variacion di keeshi y un buffet pa deleita tur hende cu exkisito arte culinario Arabe.

E dress code ta gala y e tema ta crea e oportunidad pa bisti cu e tokenan elegante, pa acentua e anochi di ‘Dubai’. Lo tin varios ‘door prize’ atractivo unda e main door prize lo ta un travel voucher di biahe balora na AWG 2500 caminda e ganador por scoge e destinancion di su gusto. Tur e fondonan cu recauda durante “Dubai Wine Gala” ta destina pa cubri e diferente proyectonan cu Kiwanis Club of Aruba ta ehecuta na beneficio di nos comunidad.