Corte ta dicta sentencia diabierna den caso asesinato de Vuyst

ORANJESTAD – Diabierna mainta huez ta dicta sentencia den e caso FIST, miho conoci como e caso di asesinato na de Vuyst di aña pasa November. Tin un sentencia di bida largo ta colga riba cabez di e unico sospechoso J. Chaljub (47), cu si huez dicta esaki, lo ta un di e poco sentencia di bida largo dicta. E sentencia ta programa pa keda duna pa 8:15 diabierna mainta. Despues e sospechoso tin 14 dia pa apela esaki. E interes pa e caso y sentencia consecuentemente ta halto, mirando e embergadura cu e tabatin den comunidad, banda di esun di e dos criaturanan cu a muri aña pasa den e mesun periodo. 

E CASO

Durante e caso cu a keda trata dia 14 di September ultimo, Fiscal a pidi castigo di bida largo pa e unico sospechoso den caso Fist (asesinato na de Vuyst), diabierna mainta. E sospechoso,- e homber  J. Chaljub (47)- , a para ariba for di cuminsamento di e caso cu e ta inocente y cu e no por mata hende cu e ta stima. Na final di e presentacion di e fiscal, el a splica cu e unico castigo cu Chaljub merece y ta responsabel y husto pa duna, ta e castigo di bida largo. E forma con segun fiscal, Chaljub a kita bida di e dama hoben Sarahi Sierra, tabata hopi tristo, a causa famia y comunidad hopi dolor y a laga Aruba den shock. Fiscal a pinta un cuadro dramatico y grafico di con autoridad a haya e curpa sin bida di Sierra dia 3 di November 2017. Fiscal a alerta tur hende den sala cu e descripcion di caso lo ta horibel, pero cu e lo trate na e forma mas respetuoso, mirando con serio y grafico tur cos ta describi.