CFT a duna Corsou deadline sino e por haya un aanwijzing

WILLEMSTAD – Gobierno di Corsou tin te dia 9 di October proximo pa presenta mas medida of alternativa den e presupuesto 2018 cu ta genera minimo 68.4 miyon na entrada extra, sino e ta risca haya un aanwijzing, osea un ‘instruccion’. Asina e carta di 9 pagina di CFT na minister di finanza di Corsou ta bisa e siman aki. E situacion financiero di pais Corsou ta hopi malo y e colegio di supervision financiero no ta mira un salida positivo sin e 7 puntonan cu CFT ta ordena gobierno pa tuma.  

E CONSEHO

“CFT ta pidi minister pa adapta e presupuesto 2018 basa riba e recomendacionan haci, y pa a base di articulo 13, inciso 1 di RFT, dentro di 14 dia, pues mas tarda 9 di October, reacciona riba e mensahe aki” e colegio ta sigui bisa. “ Si pa e momento ey tin un presupuesto cu na opinion di CFT, cu no ta cumpli completamente of den parti na e normanan di articulo 15 di e RFT, lo informa Conseho di Minister di Reino. E mensahe aki por ser acompaña pa un conseho motiva pa dunamento di un aanwijzing (instruccion) conforme ta stipula den articulo 13 di e RFT. Mes momento, NoticiaCla a compronde di su fuentenan, cu no ta kere cu e lo yega asina leu, pasobra cu Hulanda ta simpatico na e prome minister actual Eugene Rhuggenaath y cu nan kier sigui cune como prome minister.  Lesa e reaccion completo di CFT AKI. Foto ta di archivo di potret di CFT.