Aruba den Top 10 di pais pa retira si bo tin 1 miyon dollar gespaar

MIAMI – Aruba ta figura den e 10 paisnan mundial ideal pa retira si bo a logra ‘spaar’ 1 miyon dollar Mericano. Por lo menos segun e portal financiero moneywise.com. E portal a scohe 10 pais basa riba e ‘facilidad di entrada, stabilidad politico, aceso na salud publico y calidad, clima, costo di bida, ley di impuesto y barera di idioma. Aruba ta na di 10 lugar, mientras cu Panama ta e prome riba e lista. Otro paisnan prome cu Aruba ta Hawaii, US Virgin Island, Uruguay, Belize, Chile, Portugal, Cyprus y Francia. 

PAKICO ARUBA

E beneficionan pa cual a scohe Aruba den e lista ta varios. Entre nan, cu bo por aplica pa residencia permanente como un pensionado si bo tin por lo menos 55 aña, y por prueba cu bo tin un entrada annual di por lo menos $ 29,000. Ademas bo mester por prove bo adres di cas y negoshi di e ultimo decada, bo rasonan pa kier biba na Aruba, y un carta di polis y uno medico cu bo ta liber di malesa. Finalmente, bo ta paga un suma pa trabou legal cu ta varia den suma.  

IMPUESTO

E portal ta recorda tur hende cu residentenan ta paga impuesto riba nan entrada internacional, hasta riba pension y e impuesto por yega 59% pa un entrada annual di $170,000. “Bo lo kier busca un professional pa yudabo cu bo impuesto” e portal ta sigui sugeri. 

VIVIENDA

E portal ta sigui recomenda cu bop or considera cumpra un cas, un timeshare of un yate di 46 pia. Esaki lo permitibo keda na Aruba pa 180 dia pa aña y paga solamente impuesto riba bo propiedad. Por lesa e articulo completo AKI. Potret cortesia:Natalia Barsukova