Mitar di negoshi na Aruba no ta cumpli cu winstbelasting

ORANJESTAD – Casi mitar di e negoshinan registra na Aruba no ta cumpliendo cu nan declaracion di winstbelasting 2017. Asina director di impuesto Luenne Gomez Pieters a confirma na NoticiaCla. Ta trata di un grupo di aproximadamente 3000 negoshi (grandi y chikito) di e grupo di total di entre 7 pa 8000 negoshi, cu no ta cumpliendo cu e parti di winstbelasting. Sea nan no ta cumpli cu nan aangifte, y of no ta paga esaki. Esaki ta traduci na tur un suma di 2.3 miyon florin na multa. Hecho ta segun Gomez, cu e cumplimento cu e deber di impuesto dor di e negoshi nan na Aruba no ta bon. 

KICO TA PASA

Ora cu un compania no cumpli cu e parti di entrega aangifte di su ganashi (winstbelasting) na mei (e prome oportunidad) na departamento di impuesto, esaki por ta cu e no tin tur informacion debi cu e cuenta annual no ta cla ainda, e ta haña automaticamente un di dos oportunidad na November di e mesun aña pa cumpli cu su definitieve aangifte winstbelasting si e entrega un voorlopige aangifte. Sinembargo e grupo menciona di 3 mil, no a entrega nada y ta ignora nan responsabilidad completamente. Departamento di impuesto a manda pa e compania un multa di 500 florin pa incumplimiento cu por wordo escala na 1.500 si esaki ta e di dos aña cu e negoshi no ta cumpli.