Mester tin solucion pa edificio DIMAS/DAO pa diabierna awor

ORANJESTAD – Mientras cu ta soluciona e problema di holo malo y otro asuntonan higienico, trahadonan di departamento di Labor (DAO)  y di DIMAS lo keda cas. Esaki ta e decision cu minister di labor Paul Croes a sigura NoticiaCla.com diaranson mainta. No ta descarta cu ta buscando un edificio temporal pa ubica e trahadonan (57 total), pendiente e trabounan cu lo tin cu haci pa drecha e situacion structuralmente. Fuera di DAO, tin tambe e trahadonan di DIMAS, cu tambe a bay den accion diaranson mainta. Hunto, ta papia di un total di 140 trahado entre DIMAS y DAO. No ta conoci si pa e trahadonan aki tambe e regla ey lo conta, pero segun Croes, e ta sigur cu su colega minister di DIMAS Benny Sevinger, lo por haci mescos.

Mes momento e mandatario a mustra su disgusto pa e hecho cu e director di Labor no a sigui e orden di e mandatario. “Mi a bise e director cu mientras cu no tin claridad riba un solucion pa e holo desagradabel, no pone ningun hende na trabou” Croes a bisa. E director sinembargo, no a cumpli cu e orden aki. “Mi ta lamenta cu e trahadonan a wordo poni toch na trabou, siendo cu e instruccion tabata hopi duidelijk pa labor cu no por pone trahadonan den un ambiente cu no ta bon pa nan salud” e la sigui bisa. E no kier a bisa si cu e director a desobedece un orden, pero a bisa si cu e la mustra su descontento. Segun Croes, trahadonan por haci cierto trabounan for di nan cas, pa toch presta servicio, pero mientras cu e lugar no ta apto, nan lo keda cas. “Nos a duna e director orden awor atrobe pa mientras cu no tin solucion pa e problema, no ta laga ningun hende traha”.

Mientrastanto un representante di e trahadonan, Maria Koolman a comparti su disgusto na NoticiaCla.com diaranson mainta. Segun Koolman, e situacion di e edificio ta problematico. Un problema di holo tabata esun inicial, pero e la empeora. For di tempo cu nan a drenta den e edificio nobo, nan a confronta problema. “Loke ta concerni nos, ta cu e testnan haci ta tardando masha hopi mes y nos no por warda mas” Koolman a sigui bisa. E la mustra NoticiaCla.com marca na su curpa cu ta indica supuesto simptoma di rash. E problemanan segun Koolman, ta bay mas lew cu holo. "Tin problema di pieuw, carpata y raton tambe. No papia mes di e palomanan morto cu ta haya riba dak". 

Mas tardi, DIMAS a notifica pa medio di un comunicado di prensa cu pa motibo cu ta fuera di nan alcanse nan lo ta cera te cu dialuna 20 di Oktober. Tur cliente cu tin cita confirma pa entrega un peticion di permiso di estadia temporario na DIMAS tentativamente ta hala pa otro siman y ta keda notifica lo siguiente - pa motibonan ariba menciona;

Dialuna dia 13

®

dialuna proximo dia 20 di Oktober 2014 na e mesun orario

Diamars dia 14

®

diamars proximo dia 21 di Oktober 2014 na e mesun orario

Diaranson dia 15

®

diaranson proximo dia 22 di Oktober 2014 na e mesun orario

Diahuebs dia 16

®

diahuebs proximo dia 23 di Oktober 2014 na e mesun orario

Diabierna dia 17

®

diabierna proximo dia 24 di Oktober 2014 na e mesun orario