Mary Joan Foundation ta celebra 11 aña aniversario

ORANJESTAD - Mary Joan Foundation ta celebra 11 aña aniversario. Segun e fundacion cada bes cu nn cumpli un aña e ta a pone nan den reflexion profundo. Pa recorda e humilde acto pa t’ey pa un otro persona. Nan a haci'e nan enfoce principal pa sostene esnan cu ta batayando contra cancer un bes of kisas mas bes. Nan ta pone atencion na esnan cu a bringa pero awe no t’ey cu nos mas. Nan a laga nan famianan cu un espacio bashi den nan curazon, pero alabes nan ta recorda nos pa ta un luchado pa loke ta profundo den nos curazon. Balora esnan cerca di nos y e cosnan di mas chikito rond di nos. 

Mary Joan Foundation awe 26 di September, riba nan di 11 aniversario ta gradeci comunidad di Aruba, e clientenan y nan famianan pa nan confiansa den e fundacion, e team grandioso di boluntario nan pa nan tempo y dedicacion, e empleadonan baliente, tur instancianan (GO y NGO, priva) cu a kere den e esencia di e trabou, tambe tur instancia cu a para habri pa colaboracion y miembronan di prensa. “Nos ta spera cu nos por sigui bay p’dilanti cu loke ta bon y crece  for di momentonan crucial cu kisas a bay menos bon na e momento pero a yuda enrikese nos experiencia y conocemente pa  sirbi nos comunidad miho” e fundacion ta sigui bisa.

COLLECT WEEKENDS

Nan a tuma e momento pa invita e comunidad di Aruba pa bin sostene nan den e luna di concientisacion di cancer na pecho, luna di october. Nan tin nan Collect Weekends tur diasabra durante oranan di mainta como tambe oranan di atardi. Nan lo tine nan Santo Sacrifico 7 october. Un momento pa habri e luna cu na Bendicion y gratitud inmenso. Sinti liber pa bin compaña nan na Misa Birgen di Fatima na Dakota.

Wear Something Pink Day no por keda afo. Pa dia 19 di October bo(so) preparando caba pa ‘blow us away’? Nos ta cursioso pa mira ken ta bay cu premionan e aña aki.

Por ultimo pa e luna aki, nan lo tene un caminata anual, ‘Let’s Beat It!’ riba 28 di october. Un otro actividad pa uni, pasa un momento ameno ta core, cana of apoya. Corda sigui nan riba rednan social pa no perde ningun di e actividadnan.

Na esnan cu kier lecturanan (scol, compania, iglesia  grupo di deporte etc.), tuma contacto cu e fundacion! “Pa clausura nos kier yama danki un bes mas pa esnan cu a reconose e necesidad asta mas prome cu 11 aña pasa pa crea e fundacion y sin falta nos ta agradecido na nos Señor pa su Gloria”.

Comunidad, si ta desea mas informacion, sinti liber pa comunica cu nan na maryjoanfoundation@setarnet.aw, por manda un mensahe por medio di Facebook na Mary Joan Foundation Aruba of lo por yama nan di dialuna pa diabierna di 8’or pa 5’or di atardi na 588-9999. Pasa personal tambe na nan cede situa na Sabana Blanco #8 na Dakota (den cura di Atco), e ta ser aprecia masha.