Gomez: Si no paga number di auto, lo por confisca e auto

ORANJESTAD – Departamento di impuesto a manda cobransa na balor di  1.7 miyon florin na impuesto atrasa di vehiculo di motor combina cu e multa. Esaki ta a base di e cambio di ley cu a tuma lugar entrante 2017 cu awor por manda e asina yama ‘naheffingsaanslagen’ pa esnan cu no a paga nan impuesto di number di auto ainda. Segun director di impuesto Luenne Gomez na NoticiaCla, ta trata di aproximadamente 17 mil plachi ‘A’, y ta suma 1.7 miyon incluyendo un boet. E ta considera esaki hopi y ta lamenta cu esaki ta yega asina leu. Esnan cu no cumpli cu e cobransa aki por haya nan auto confisca prome cu fin di aña ainda. 

LEY NOBO

Manera ta conoci, antes un automobilista por a paga su plachi den 4 paga, esta pa cuartal. Pero desde algun aña esaki a cambia y mester paga esaki den 2 paga, cu e prome fecha venciendo fin di januari y e otro comienso di juli (a cambia esaki despues pa fin di juli). Segun Gomez, envez di manda e ‘naheffing’ na februari pa e prome incumplimento y despues e otro e prome siman di augustus, a warda te awor, pa haci tal. Ni asina hendenan no a cumpli. Pues aworaki ta bay  tuma e siguiente paso, conforme cu ley, unda cu ta manda cobransa na cas pa e persona, y ta dune un luna chens pa cumpli cu e pago. Si esaki no resulta, e persona ta haya un aanmaning (recordatorio), sigui pa e medida mas drastico, cu ta resulta den confisca e auto(nan) di e persona(nan). A sigura cu esaki lo sosode prome cu fin di aña ainda, pues esnan cu no cumpli, por haya nan mal sirbi prome cu fin di e aña aki ainda. Esaki ta di lamenta pasobra por a wordo evita.