Gomez: Naheffing di impuesto ta pa falta di cumplimento

ORANJESTAD – Recientemente varios comerciante a expresa nan critica riba departamento di impuesto, pa e cantidad di ‘naheffingsaanslagen” cu nan ta hayando di impuesto. Den un reaccion di director di impuesto Luenne Gomez na NoticiaCla, a confirma esaki, pero cu tin motibo pa e cantidad extra di cobransa aki. E departamento den su afan pa agilisa e proceso di cobransa pa logra mas cumplimento (compliance) awor ta opera di e forma cu cierto cobransanan ta saliendo mas lihe y ta mustra cu ta awor e departamento a lanta for di soño. Pero si un compania ricibi un naheffingsaanslag, ta pasobra nan sea no a yena y/of paga e impuesto di un manera corecto.

AUTOMATISA

Un di e cambionan ta cu ta automatisando e proceso y awor cosnan ta bay mucho mas liher y eficiente. DIMP tin un miho grip riba e proceso di non-compliance. Si antes tabata warda henter un aña pa haci control ken a paga y ken no, awor esaki ta diferente y por hala atencion mas liher di e cliente. Pa luna tin entre 7000 y 9000 naheffingsaanslagen cu ta sali pa loonbelasting y BBO. E sistema mes ta ‘pick up’ esaki y ta registra esaki. Mes momento, aunke cu no tabatin un control hopi rigoroso, clientenan no tabata atende di un manera serio cu nan pago y declaracion di impuesto. “Nan ta djies manda un suma pa e departamento di impuesto sin specifica kico nan a paga, ki periodo nan a paga. Y e sistema no por match e pago asina”Gomez a bisa. Hopi cliente ta  keha cu nan a paga na  tempo pero ta resulta despues cu esey no tabata e caso. 

NA TEMPO

Un cliente no ta haya un aanslag si e ta na tempo cu su pagonan di impuesto, segun Gomez. Si e haya un cobransa, algo mester a bay robez den e pago of e aangifte. 

HACI LO CORECTO 

Un cliente mester simplemente yena su formularionan corecto, specifica esaki corectamente y entrega esaki na tempo. Si e cliente haci tur esaki bon, no tin ningun reaccion di departamento di impuesto y e sistema no ta ‘trigger’ ningun reaccion pa saca ningun naheffing segun Gomez. Pues, e ta ripiti, cu si hendenan a cuminsa haya hopi naheffingsaanslagen tras di otro diripiente, ta pasobra algo a bay robez den e pago y/of declaracion. No ta descarta cu por tin fout nan chiquito haci door di Departamento di Impuesto mes mirando cu no ta tur banco ta ariba e plataforma online ainda y cu gran parti di e pago nan aki ta sosode ainda manualmente.