Otro grupo di illegal Venezolano a subi tera na Seroe Colorado

SEROE COLORADO – Mientras cu oficialmente polis no a duna ningun informacion ainda, media na Aruba ta raportando yegada atrobe di personanan cu a subi tera na Aruba ilegalmente, procedente for di Venezuela. Ta trata di un grupo di Venezolano cu a yega y subi tera den fin di siman, y cu a keda gara dialuna marduga/mainta pa personal di polis y Warda Costa seccion Aruba. Segun declaracion na e portal 24ora.com, nan a mustra cu nan ta na Aruba for di diasabra, mientras cu personal di Warda Costa ta disputa esaki mirando cu algun di nan tabata ‘muha’, indicando cu nan lo a caba yega. A splica cu nan ta bin di Venezuela pasobra nan tin problema pa haya cuminda y trabou. Loke a hala atencion ta cu varios di nan a admiti publicamente cu nan a yega di traha na Aruba caba na varios caminda, y despues a keda deporta. Asina mes nan a logra drenta Aruba atrobe. Potretnan cortesia 24ora.com