Aruba a firma declaracion pa sigui coopera entre LGOnan den Caribe

 ORANJESTAD - Aruba a firma declaracion pa sigui coopera entre LGOnan den Caribe. Aruba tabata cede di e summit Post COSME na Renaissance Convention Center. Despues di un dia cu diferente presentacionan di diferente expertonan internacional, ministro di Finanza  Xiomara Ruiz-Maduro a firma un declaracion pa sigui cu e cooperacion entre LGO nan den Caribe pa busca formanan pa traha hunto y sigui cu e apoyo na nos empresanan chikito y mediano manera cu COSME. Otro dignatarionan presente pa firma tabata ministro di Desaroyo Economico di Corsow, sr. Steven Martina, Ministro di Salud, Agricultura y Servicionan Humano di Turks and Caicos sr.  Edwin Astwood y diputado di Boneiro sr. Hubert Martis.

PRESENTACION

Sra. Diana Hendrickson di GOPA a presenta varios proposicionan pa continua cu e trabaonan di COSME y colaboracion entre e diferente islanan LGO den Caribe. Parti di e presentacionan a tuma lugar via digital unda diferente expertonan desde nan pais a trece temanan manera; con pa crea un e-commerce platform,  creacion di un LGO regional think tank, funcionamento di un LGO helpdesk na CAIPA y mucho mas.

CARIFORUM

Secretario General di CARIFORUM sr. Percival Marie a duna via skype un speech riba relacionan entre LGO- EU -CARIFORUM y sra. Taiana Mora a duna un relato riba diferente posibilidadnan pa e LGOnan den region traha huntu cu CARIFORUM teniendo na cuenta experiencianan di pasado.  Sra. Mora a trece dilanti e importancia pa cada isla determina nan prioridadnan y hunto busca interesnan comun como LGOnan den Caribe. Otro representantenan di gobierno di Anguilla, Corsow, Boneiro, Turks and Caicos y Aruba tabata presente. Presidente y directora di Camara di Comercio di Aruba, sr. Ernst Mohamed y sra. Sonja Velthuizen a participa como stakeholders di e programa COSME y pa duna nan sosten na e continuacion di e cooperacion den region cu ta crea oportunidadnan pa empresarionan.