Karen Sledge y Eric Darius a captiva publico na Caribbean Sea Jazz

ORANJESTAD – Karen Sledge di e grupo popular legendario Sister Sledge a hiba tur hende den tempo diasabra anochi durante e di dos y ultimo anochi di e di 12 edicion di Caribbean Sea Jazz Festival. Tabata obvio cu e anochi ey tabata pertence na e grupo aki, cu a pone tur hende biba pasado di añanan 70 y 80. Cancionan manera ‘We Are Family’ a zona y tur hende a biba e momentonan grandi aki. Prome cu esey, tabatin saxofonista Eric Darius y flautist Althea Rene cu a captiva e publico cu nan presentacion. Darius a baha den publico y a complace un y tur a base ‘personal’ dunando serenata personal pa un cantidad di hende presente. Di Mongo, Yellow Jacket y Di-rect a clausura e anochi cu nan presentacion sublime, treciendo recuerdonan bek di pasado. Otronan cu tambe a mustra kico nan tin aden ta e Arubiano legendario Delbert Bernabela, Roberto Pablo Trio cu a presenta un tributo na e cantante Sade.