Horcan Gonzalo a laga saldo di un morto na St Maarten

PHILLIPSBURG – E horcan Gonzalo den su pasada dialuna atardi/anochi, a laga e saldo di un morto atras na St Maarten. Esaki a keda confirma pa alto comisario di polis di St Maarten, Peter de Witte na NoticiaCla.com diamars atardi. “Ta trata di un persona homber cu a keda den su yate, cu a dal den tera y keda destrui”, de Witte a bisa. No por a duna nomber pasobra no tabata conoci si e famianan ya a keda notifica. Fuera di e persona aki, no tin otro caso di fatalidad ni hende perdi. “E parti frances si ta papiando di algun persona cu ainda ta perdi” de Witte a sa di bisa NoticiaCla.com. “Hopi daño di awa, y palo kibra. Hopi daño di awa” de Witte a sigui bisa.

Remarcable ta cu a prepara pa un tormenta, y a haya un horcan. Fuera di esey a haya un fenomeno hopi peculiar. “E horcan dado momento a bira riba St Maarten y a cambia di direccion. Pues un momento e tabata bin di un direccion, y diripiente e la bira y bin di otro direccion” e Alto Comisario a sigui bisa. Algun cas a keda sin dak, of a perde parti di dje. Otronan a haya hopi daño di awa, ora cu sea laman a drenta nan cas of a haya problema cu awacero excesivo. “Den un caso, dak di un edificio banda di esun di nos (base di polis), a bula for di e edificio, y bin cay riba algun di nos autonan” de Witte a sigui bisa. Pues nan edificio a keda bon, pero toch a haya daño di e dak di bisiña.

Loke cu de Witte a keda hopi contento cune ta cu e cuerpo cu a dedica su mes completo pa e ‘actividad ciclonico’ aki, lagando nan famia na nan cas, y percura pa orden y trankilidad den comunidad. “Mi ta echt hopi hopi contento cu e labor cu mi hendenan a desplega durante e periodo aki” de Witte a bisa. “Nan tambe tin famia cu mester di nan, pero nan a duna tur cu tin pa sigura cu tur cos por a bay bon” e alto comisario a sigui bisa.

E daño principal ta di awa excesivo, palonan kibra, y waya di coriente destrui. Tur esaki ya caba ta sea den proceso di reparacion of a wordo drecha caba. Camindanan cu a keda blokea cu resto di palo of cosnan di horcan, a keda libera di dje y haci limpi caba. “Scolnan ta habri bek mayan caba” de Witte a sigura NoticiaCla.com. Na tur, St Maarten ta ‘up and running’ atrobe. “E no tabata mes malo cu Luis (horcan cu a destrui e isla na 1995), pero nos a haya un bon bati si” de Witte a finalisa bisando.