Medwork cu donacion na Stichting Ambiente Feliz

ORANJESTAD - Medwork Caribbean N.V. ta sostene varios fundacion den e sector social por medio di servicionan den forma gratuito of por medio di descuento grandi. Fundacion Ambiente Feliz ta un di e fundacionan cu nos compania ta yuda cu hopi placer. Stichting Ambiente Feliz (SAF), un gezinsvervangend tehuis pa persona adulto cu limitacion mental, ta un fundacion cu ta ofrece 24 ora cuido y guia pa casi 32 aña caba. Famia hopi biaha ta acudi na Ambiente Feliz ora nan yiu of ruman no por ricibi e cuido necesario na cas mas. E lista di espera ta uno largo cu ta sigui crece y ta conoce hopi caso urgente cu ta den crisis caba. Pesey Ambiente Feliz a acepta e invitacion di parti Fundacion Guia Mi, Cede Aruba y Stichting Verstandelijk Gehandicapten Aruba pa ta esun cu ta bay maneha e proyecto na Centro di Cuido na Palisiaweg. E proyecto aki a forma parti di e Sociaal Crisiplan di Ministerio di Asunto Social na unda lo habri un ‘gezinsvervangend tehuis’ nobo pa 20 cliente cu mester di e cuido mas intensivo. 

E necesidad den e grupo di persona cu limitacion ta birando mas y mas grandi y complica. Awendia den hopi caso nos no ta papia mas di 1 limitacion so. E termino ‘meervoudig beperkt’ ta wordo uza pa defini e grupo di persona cu tin mas cu 1 limitacion. Door di desaroyo den e mundo medico y e cuido cu ta wordo brinda, nos personanan cu limitacion tambe ta birando mas bieu. Algo cu nos ta jama ‘vergrijzing’. 

Den e 3 units/casita cu ta situa na Centro di Cuido, Ambiente Feliz lo bay habri e prome cas pa mucha na 2019. Si tur cos bay bon lo habri e otro cas tambe cu ta destina pa hoben y adulto. E di 3 cas lo habri su porta na 2020 pa esunnan riba di 55 aña di edad.

Pa por ofrece e cuido necesario e ta rekeri un sosten grandi y continuo di comerciante y tambe comunidad di Aruba pa yega na e fondonan financiero. Tur cos a bira mas caro, pero e cuido tambe a bira mas intensivo. Ambiente Feliz ta remarca cu tin mas necesidad na ‘hulpmiddelen’, material y otro. Pa por cumpli cu e rekesitonan di e ley di Verzorgingshuizen cu a bay na vigor na 2017, e Fundacion mester por lo menos 2500 AWG mas pa luna pa por cubri cu tur su gastonan mensual. E suma extra aki no ta cubri e gasto pa drecha un dak of haci otro trabou di mantencion.