FTA: Menasa di accion na FCCA otro siman pa impasse laboral

ORANJESTAD – Posibilidad ta grandi cu otro siman por tin accion na Fundacion Cas pa Comunidad Arubano (FCCA). Segun president di e sindicato FTA Rudy Dirksz, diferente den interpretacion di un CAO cu ta den negosacion ta e motibo di e impasse. Un reunion cu e sindicato a yama cu character di urgencia  pa dialuna awor, ta determina kico ta sosode awor. Durante e reunion lo informa e trahadonan y laga nan dicidi kico e siguiente paso. 

EXCLUSION LIST

Un di e problemanan segun Dirksz, ta e asina yama exclusion list, cu ta un lista cu ta indica ken ta forma parti di e CAO y ken no. “Nos tin esaki den tur compania, unda cu tin un grupo di trahado cu logicamente pasobra e ta manager, e no por ta miembro di sindicato hunto cu otro gruponan” Dirksz a splica. Den e caso aki, e compania kier hinca tur hende den e exclusion list cu FTA ta haya ‘unfair’. “Nos ta haya cu compania ta bay mucho leu, y compania ta bisa cu si nos no por yega na acuerdo, no tin motibo pa sinta na mesa cu nos mas” Dirksz a sigui bisa. Pues e gerencia a hala for di mesa. Pa loke ta e cantidad, segun Dirksz, e mayoria ta miembro aunke e no por a bisa e cantidad exacto. 

TIPO DI ACCION

Un di e accionan cu e sindicato kier, ta pa forza e gerencia di bay mesa (di negosacion) bek, pa por continua cu e CAO y resolve e problema di exclusion list. Lo mas probable segun Dirksz ta cu lo pidi intermediacion di mediado di gobierno, y despues di esey si no yega na un acuerdo, no ta descarta cu lo por tin cualkier otro accion incluyendo un paro di trabou.