Wever na Argus: Chens cu CITGO deal sigui bou circumstancia actual ta hopi chikito

ORANJESTAD – ‘Bou di e circumstancianan, e chens cu CITGO por cumpli cu e deal (e reapertura), ta hopi chikito” Asina prome minister Evelyn Wever a declara na prensa internacional recientemente, particularmente e portal industrial conoci Argus. E articulo mes ta relata cu ‘Aruba ta perdiendo pasenshi cu e forma lento cu  CITGO ta trahando pa transforma e refineria den un upgrader’.  

DEADLINE

Fuera di bisa cu e chensnan ta chikito cu e deal den e situacion actual, por sigui, Wever a sigui bisa cu si pa October 2020 CITGO no habri, gobierno por kibra e deal y busca un otro partner. Algo cu ta conoci caba na Aruba. 

FALTA PLACA

Segun Argus, loke e proyecto falta, ta financiamento, y confiansa di e stakeholdernan nan abilidad pa cumpli cu e contracto cu e gobierno actual a hereda di e gobierno anterior. Ta haci mencion cu CITGO no a complete fase 2 cu ta inspeccion. A haci mencion tambe di e compromiso cu CITGO a haci na augustus na Aruba pa injecta 35 miyon dollar den fase 2 cu lo mester core te mey di 2019. 

NO FABORABLE

Segun e president di directive di Refineria di Aruba (RdA) Richard Eman, e contracto no ta hopi faborabel pa Aruba. Segun Eman, e acuerdo tin puntonan desfaborabel pa Aruba, cu ta hacie dificil pa ‘kibra’ prome cu October 2020. “Tin un falta di confiansa den CITGO pasobra e no a produci, pero nan tin tempo pa prueba nos robez” Eman a sigui bisa na Argus. Ni CITGO na Houston of CITGO Aruba no a reacciona pa e articulo di Argus.