Ruiz: Banco Central mester ta mas presente den nos comunidad

ORANJESTAD – Como solucion pa caba cu e polarisacion politico cu tin na Aruba riba e.o. tema financiero, Banco Central di Aruba mester ta mas presente den nos comunidad. Minister di Finanza Xiomara Ruiz a mustra esaki awe den un conferencia, reacionando riba e conferencia cu lider di partido berde Mike Eman a duna awe mainta riba e tema di finanzas, citando documento di Banco Central y creando, segun Ruiz, polarisacion politico. Esaki sin cu Banco Central ta bin afo pa splica e situacion di nan banda. Segun Ruiz, e loke cu el a bisa cu Banco Central tin cu haci awo, el a bisa den pasado caba como parlamentario pues no ta nada nobo. Esta cu e instituto financiero mester ta mas ‘publico’.  

CONFERENCIA DI PRENSA

Ruiz a declara den e contesta na NoticiaCla cu awe mainta ainda el a bisa director di Banco Central Jane Semeleer, cu a bira tempo den e pais aki pa (Banco Central y Gobierno) tene un conferencia di prensa caminda Banco Central ta duna nan parti di con Aruba a yega na e situacion cu nos ta aworaki, kico e ta y con nan ta mira e pasonan pa bay dilanti. Ruiz ta mustra cu e mes mester por ta sinta como minister encarga di Finanzas, como e parti politico banda di Semeleer y unda Banco Central ta encarga cu e parti caminda pueblo ta wordo debidamente splica ariba e situacion financiero actual.  

TAREA CIVICO

Segun Ruiz, Banco Central mester ta un poco mas acesible cu solamente manda un rapport cada pasa tempo. “Ta yega un tempo cu mester brinda conferencia di prensa” Ruiz a bisa. A referi na e tempo cu su actual consehero, antes minister di finanza Nilo Swaen tabata sinta hunto cu Banco Central y duna conferencia di prensa. A mira despues ora cu gobierno a cambia y a bira gabinete Eman, cu diripiente a bin un silencio den sentido di un practica caminda Banco Central no ta duna conferencia di prensa mas. “Esey tin mas di haber cu sr Eman” Ruiz a bisa, indicando cu Eman lo no tabata kier pa Banco Central duna conferencia mas. Den pass

DUNA ORDO

Ruiz a sigui mustra cu no ta su intencion pa bay impone riba Banco Central kico nan tin cu haci, y e no ta(bata) na altura legalmente si e por haci esey como minister. Y ademas, segun Ruiz, si bo ta goberna drechi, no mester impone riba ningun hende.