Oduber: Permiso duna na Caledonia Properties e tempo ey no tabata problema

ORANJESTAD – Berdad cu ta un ex minister cu awe ta miembro di partido cu ta parti di coalicion actual (sra Marisol Lopez Tromp) tabata envolvi den dunamento di tereno erfpacht na e compania Caledonia, y a haci esaki via un acta di notario na 2006 cu aprobacion di conseho di minister e tempo ey. Prome cu esey tabatin un acuerdo inicial di 2005, cu a stipula cierto condicion. Pero despues pa ora cu tabatin e acta di notario mes, e condicionan a cambia. E tereno mes tabata di e propietarionan desaroyador di prome cu 2005 y tabata tereno eigendom. A dicidi di cambia esaki y entregue na gobierno e tempo ey pa haye bek como erfpacht. Riba pregunta di NoticiaCla con bin e tempo ey tabata ok pa duna e tereno ey,  e mandatario a bisa cu e tempo ey no tabatin problema di tereno y ROP manera cu ta awe. Mientrastanto minister di infrastructura Otmar Oduber a clarifica pa NoticiaCla  e acusacion cu ta gobierno anterior a duna permiso di hotel cu awor e gobierno actual a haye pega cune. Berdad cu tabata un gobierno anterior, di signatura MEP, y cu su actual colega di partido tabata envolvi. Sinembargo ta despues, cu gabinete Mike Eman, cos a cambia unda cu ministernan Benny Sevinger y Mike de Meza a purba trece cambio na e destinacion y e proyecto na 2017 cu un proyecto hotelero di 350 camber,  cu no tabata segun e plan. E mandatario actual a cuestiona e hecho cu ta purba haci politica cu e tema, pasobra ta e colega actual di partido ta esun cu a firma e acuerdo cu e grupo hotelero