Expertonan di inglatera na Aruba pa investiga composicion di nos desperdicio

ORANJESTAD - E siman aki ta tumando lugar un proceso di investigacion di composicion di desperdicio na Parkietenbos. Asina ministerio di medio ambiente a informa e siman aki pa medio di un comunicado. Locual cu e expertonan ta haciendo ta: ricibi coleccion di desperdicio residencial y comercial cu ta wordo ‘tipped’ den e planta pa despues wordo sortia. Tur e desperdicio sortia ta wordo hinca den bakinan specifico caminda cu lo pisa esaki, stiwa nan y exporta pa wordo getest den laboratorio na Inglatera.

E investigacion ta hopi importante pa futuro di desperdicio na Aruba, teniendo na cuenta e direccion cu Pais Aruba ta bayendo. Mott MacDonald cu ta un compania di Inglatera cu actualmente ta na Aruba guiando e investigacion conhuntamente cu un biologo marino Stacy Brete cu tin experiencia den e tipo di investigacionnan aki. 

Resultado di e investigacion lo indica e ‘caloric value’ di e componentenan di desperdicio residencial y comercial. E caloric value ta importante pa sa pasobra esaki ta duna indicacion di e tipo di gas cu lo wordo produci den e ‘energy recovery process’/ ‘waste to energy’. Mirando cu nos ta bayendo den un futuro unda cu nos ta uza e tecnologia di incineration aki na Aruba e informacion aki ta necesario.

A pesar cu e componente di desperdicio aki na Aruba ya caba ta conoci door di e diferente investigacionnan cu a haci desde comienso di aña. No tabatin e informacion di caloric value como cu no tin e laboratorio na Aruba pa haci e testnan. Awor cu a tuma e decision pa manda e desperdicio afo, pronto lo haya sa ki balor nos desperdicio tin pa asina maneha cu e proceso di ‘waste to energy’ den futuro na un manera mas eficiente y responsabel.