Ta disolve fundacion MUSICA otro siman y lanta otro fundacion

ORANJESTAD – Fundacion MUSICA desde otro siman no ta existi mas como fundacion. Fuentenan yega na e fundacion a confirma na NoticiaCla.com diamars merdia, cu e fundacion a dicidi dialuna anochi cu nan ta disolve e fundacion y lanta uno nobo. “Hilduard Croes a pidi su retiro dialuna anochi como presidente” e fuente a sigura NoticiaCla.com. Pero a pidie pa sigui te ora cu e fundacion nobo keda lanta y opera. No ta conoci ki nomber e fundacion lo haya, pero a confirma cu pa otro siman, e fundacion ‘bieu’ bou di nomber di MUSICA, no ta existi mas.

Durante un reunion dialuna anochi, e fundacion su miembronan a bin hunto y a tuma e decision drastico aki. Como un resultado di e decision aki, ta resolve un problema cu lo por tin di contracto cu SAC, ya cu si no tin un fundacion existente, no por tin un contracto valido tampoco. Manera ta conoci, Stichting Arubaanse Carnaval (SAC) a firma un contracto cu fundacion MUSICA pa un periodo di 5 aña durante cual nan tin cu organisa e Calypso y Roadmarch contest. Nan a cumpli 2 aña y falta 3 aña mas di contracto.

Pero dialuna anochi durante e reunion tambe nan a dicidi cu si SAC organisa carnaval, e musiconan miembro di MUSICA (ainda), lo no participa den nada di SAC, y no ta organisa ningun festival di Calypso y Roadmarch. Pero mirando cu nan ta mara na contracto, esaki por ta un problema. No ta conoci si ta esaki ta e motibo cu nan ta disolve e fundacion, manera cu NoticiaCla.com a wordo informa di dje.