Kedando cla pa anuncia hotel riba Eagle Beach di 240 camber

ORANJESTAD – Fuera di e construccion di e hotel cu gobierno a anuncia diamars mainta (St Regis Resort), tin un hotel mas di 240 camber cu gobierno ta kedando cla cune pa por anuncia su construccion. Ta trata di e compania The Sands cu tin permiso pa traha un hotel riba e unico pida tereno na Eagle cu a keda, unda cu gobierno anterior a autorisa e hotel pero e tempo ey pa 680 camber. Minister di infrastructura Otmar Oduber mes a haci mencion di e caso aki tambe diamars durante e conferencia di prensa unda cu a anuncia e plan pa hotel St Regis. 

MENOS CAMBER

Oduber diaranson a subraya cu a logra convence e  doñonan pa baha e cantidad di camber te na 240, y hacie un hotel European Plan (EP), envez di all inclusive manera tabata e plan. “Nos no ta cla ainda” Oduber a bisa NoticiaCla diaranson mainta. Asina cu nan keda cla, nan lo haci e anuncio official pa cu e hotel aki. 

CLA CABA

Tambe Oduber un dia anterior a bisa cu no ta e gobierno aki a bin cu e hotel aki, sino ta algo cu nan a haya cla di e gobierno anterior. “No ta duna, gobierno (aki) a duna mas permiso, sino ta bahando e compromise(nan haci)” Oduber a bisa durante e conferencia di prensa diamars. A mustra cu ta negoshando cu mas hotelero pa asina reduce e cantidad di camber cu a wordo ‘otorga’ pa gobierno anterior. Por corda cu durante un conferencia di prensa na januari 2017, ora cu Oduber no tabata minister mas y a tene e conferencia di prensa como lider di e partido, a mustra cu gobierno cu e tabata forma parti di dje anterior, a anuncia cu tabatin 4000 camber mas na caminda di hotel y condominium. Awe, Oduber ta mustra cu a logra reduce esaki ten a 2800 camber  y ainda ta trahando riba esaki.

CRITICA

Despues cu gobierno a anuncia e construccion di hotel St Regis, tabatin basta critica riba rednan social di tur banda, cuestionando e idea aki y con gobierno toch ta sigui construi, mientras cu a bisa claramente cu no ta bay traha mas hotel na Palm Beach, y ta solamente pa area di San Nicolas mester bin uno. Mesora representantena di gobierno a cuminsa contra aresta e ponencianan y splica cu no ta gobierno actual, sino ta cosnan cu gobierno a haya cla caba y cu no por haci nada mas, fuera di bay corte cu e chens cu ta perde esaki. De hecho, The Sands tabata cla pa bay corte y a entama un caso, pero despues a revoca esaki. Y asina tin mas compania cu ta cla pa hiba gobierno corte si no honra e palabracion haci cu gobierno anterior. 

MORATORIUM

Un di e critica tambe tabata cu con por ta posibel cu ta sigui presenta hotelnan nobo, mientras cu parlamento algun luna atras (20 di april 2018) a aproba un mocion cu ta pidi pa para tur hotel y introduci/respeta un moratorium. Pero awor ta mustra cu tanto bal cu tin un mocion cu parlamento a aproba, ya cu permisonan di hotel ta wordo duna toch. Un di e critica tabata di un parlamentario di partido MEP, Daphne Lejuez cu tambe a mustra su malcontento riba e.o. Facebook.  Segun Lejuez, Parlamento a pidi via mocion pa un kosten/baten analyse prome cu sigui cu proyectonan hotelero pa wak nan efecto riba nos comunidad vs e costo pa cancela proyecto .“ Parlamento a pidi moratorium - pero ta pendig ROP ta lamenta cu ta sigui otorga permiso sin prome defini e ROP y wak si ainda e localidadnan duna ta cuadra cu e vision nobo di ROP/gobierno . Tin un social economic impact assessment of un environmental impact assessment pa cu e proyectonan cu lo bai otorga?” Lejuez a sigui bisa.