Liñanan pinta riba rotonde Cumana confundiendo automobilistanan

ORANJESTAD – E liñanan recien pinta riba e rotonde na Cumana tin hende hopi confundi. Recientemente contratista Mota Engil a laga pinta liñanan na e rotonde pa avisa automobilistanan con nan tin cu core riba e rotonde. Pa sorpresa di hopi, a opta pa pinta e liña conoci como ‘sergeant’, serando un liña completo ora cu yega e rotonde for di direccion aeropuerto, hacienda e liña pa un solo fila. Y ora cu bo subi e rotonde, bo ta haya un liña cu diripiente ta pega riba e liña di beton, como si fuera e ta fout pinta. Personal di DOW no a bin dilanti ainda pa splica kico e intencion ta, pero a crea mas confusion cu claridad. 

COMENTARIO

Riba Facebook por a nota hopi comentario di hende cu ta completamente confundi cu e liñanan aki, sigur teniendo cuenta cu a pinta e liñanan aki sin duna splicacion publico kico kier men cu esaki. Diripiente ta haya un liña sergeant, pa despues confronta un liña cu ta caba na nada mei mei di e rotonde, confundiendo e automobilista. 

REACCION DOW

NoticiaCla a tuma contacto cu DOW pero e hefe ta cu vacacion y e suplemente tabata den reunion henter mainta. A compronde cu e rotonde no ta cla, y cu esaki ta parti di e proceso, y cu posiblemente ora cu e rotonde ta cla, lo por compronde e logica. Pero aworaki e rotonde ta mustra como si fuera e ta mas un confusion, envez di un solucion pa trafico sigur.