Gobierno a manda presupuesto 2019 pa CAFT

ORANJESTAD – Presupuesto 2019 a bay diamars pa e colegio di supervision financiero CAFT. Asina e mandatario encarga cu finanzas Xiomara Ruiz Maduro a confirma pa NoticiaCla diamars anochi. Ayera mas prome, Conseho di Minister a firma e presupuesto 2018 cu ta nifica cu e ta cla pa cuminsa e proceso di tratamento. Y den cuadro di esaki, un di e instancianan cu mester repasa e presupuesto, ta CAFT y Raad van Advies. Ora cu esaki bolbe, gobierno tin cu adapta esaki cu nan comentario y presenta esaki despues porfin na Parlamento pa por cuminsa cu e tratamento. 

DEADLINE

Segun ley di Laft, presupuesto mester ta aproba pa Parlamento y den man di CAFT pa conseho, pa mas tarda 15 di December di e aña anterior. Pues 15 di December 2018. Gobierno a bisa NoticiaCla cu a haya hopi contratiempo cu e aspect di gasto di personal, pero cu finalmente a logra sali afo y keda cu e palabracion haci cu Hulanda. E intencion ta pa tanto den 2018 y 2019 reduci e gasto di personal cu 12.5 miyon florin.  

MAS PRESUPUESTO

Segun gobierno, den apenas algun luna di gobernacion, Gabinete Wever-Croes a prepara 3 presupuesto: Presupuesto Supletorio 2017, Presupuesto 2018 y Presupuesto 2019. Nos a logra baha e deficit cu nos a hereda den 2017 di 155 miyon te na 25 miyon pa 2019. “ Cu esaki nos a cumpli cu palabracionnan haci y cu nos compromiso cu e pueblo di Aruba” un comunicado di gobierno a bisa diamars. No tin fecha ainda pa trata e presupuesto 2019.