A cera supermercado y a duna otro advertencia pa bende cos caduca

ORANJESTAD – Recientemente e departamento cu ta controla supermercado (DEZHI) a cera un supermercado pa 2 dia y a duna un otro advertencia pa a bende productonan caduca. Asina e departamento a informa pa medio di un comunicado. DEZHI  ta haci su control na supermercadonan riba prijs máximo di productonan di canasta básico y mensualmente e control ta wordo amplia cu Departamento di Salubridad Publico y Cuerpo Policial. 

RESULTADO DI CONTROL

Diamars mainta e team di control forma pa Departamento Economico (DEZHI), Cuerpo Policial (KPA) y Departamento di Salubridad Publico (DVG) a haci varios control na diferente supermercado den Oranjestad y Dakota. E control a tuma lugar riba prijs di productonan cu ta forma parti di e canasta basico., tambe a controla e parti higiëna y sanidad di e establecimientonan y si e lugar tin tur e permisonan necesario na ordo regla pa nan por opera. 

MEDIDA CONTRA SUPERMERCADO

A constata cu un supermercado na Dakota, no tabata tin su papelnan na ordo, como tambe no tabata cumpli cu e exigencianan di sanidad. E departamentonan concerni a tuma e decisión y a será e supermercado pa 48 ora, pa esnan encarga pone e supermercado den bon condición, cumpli cu sanidad y regla nan permisonan necesario. Otro supermercado na Playa Pabao tambe a wordo controla y varios productonan cu nan fecha a vence mester a wordo saca y destrui y e doñonan a wordo atendí seriamente pa autoridadnan. 

CONTROL TA SIGUI

E control ta sigui y e establecimiento cu no cumpli lo ricibi sanción, como tambe pa garantisa cu e supermercadonan ta cumpli cu e prijsnan maximo stipula pa gobierno pa locual ta e productonan di canasta basico, pa tin na ordo y vigente e kaarchie berde, tin e lugar limpi y higienico y cu e permisonan di operacion ta na ordo. E maneho di control ta continua di parti ministerio di Finansa, Asuntonan Economico y Cultura pa garantisa cu e consumidor ta wordo ofreci productonan na bon prijs y calidad.