AHATA ta organisa e di 17 edicion anual di Coastal Clean-Up

ORANJESTAD  - E aña aki Aruba Hotel & Tourism Association (AHATA) ta organisa nan di 17 evento anual di “Coastal Clean-Up”. E evento di “Coastal Clean-Up”na costanan di Aruba lo tuma luga e aña aki diasabra dia 27 di October entre 8:00am pa 10:30am. Aña pasa e tema tabata "Aruba Ta Dushi, Sin Sushi” y e biaha aki e comision a scoge e tema “Pa Bienestar di Aruba”.  E meta di e “Coastal Clean-Up” ta pa conscientisa tur hende riba e importancia di mantene un Aruba limpi. E ta mas dushi pa biba riba un isla limpi, sin plastic y otro materialnan cu por ta dañino pa nos flora, fauna y e bida marino. 

Durante e di 16 edicion a participa 1,898 persona, cu a topa na diferente punto y a sali bay direccion di tur e areanan asigna. E areanan tabata Baby Beach, Santana di Cacho, Bachelor’s Beach/Plastic Beach, Boca Grandi, Rincon, Grapefield/Dijk, Santo Largo, Eagle Beach, Palm Beach Area, Boca Catalina/Arashi/Anaboei, Duinen na California, Druif patras di Faro, Boca banda di Green House, Urirama Beach, 4 boca patras di Alto Vista, Tanki di Alto Vista, Boca Bolongfa, Fuente, Wadirikiri (te Boca Prins), Fisherman Hut, Tres Trapi Malmok y Linear Park te Aeropuerto. Esunnan cu a participa aña pasa a piki hopi saco di sushi cu a yena no menos di 7 container.

Durante e ultimo 16 aña, AHATA a conta cu apoyo y participacion di AHATA su miembronan, scolnan, instancianan, companianan, habitantenan di Aruba, turistanan y nos ta masha gradicido pa cu esaki.

AHATA ta desea un biaha mas invita un y tur bin participa den e di 17 “Coastal Clean-Up” “Pa bienestar di Aruba” hunto nos por haci un diferencia. Pa mas informacion y/of registracion por tuma contacto cu oficina di AHATA na 582-2607 of manda un e-mail na vanessa@ahata.com. Ultimo dia pa registra ta dialuna 8 di October proximo. Bini uno bini tur, bo contribucion ta altamente aprecia.