Grupo Uni: Ta priminti carnaval innova y participacion real di grupo

ORANJESTAD – Primintiendo inovacion grandi y un participacion real di tur gruponan di carnaval, Grupo Uni a presenta nan mes na prensa diamars durante un conferencia di prensa. SAC tabata anticua y traha a base di e concepto ‘copy paste’ pa 60 aña largo. Y segun e vocero di e grupo, Kevin van Ommeren, ta tempo pa un cambio. Van Ommeren, mientras cu e no kier a divulga e plan exacto, a sigura cu nan si ta cla pa ‘moderniza’ carnaval y trece e cambionan cu ta necesario pa por haci carnaval financieramente atractivo.

Prome cu esey, van Ommeren a repasa e trayecto di reunion cu tur e ‘stakeholder nan’ te na e punto cu nan ta awe. Y aki tambe (mescos cu e grupo di SAC), nan ta papia di falta di confiansa y participacion, cu ta pone cu awe nan ta determina pa no participa na carnaval si SAC toch logra gana un ‘eventual’ caso den corte. “Si SAC organisa carnaval, tene sigur cu Grupo Uni lo no participa na e carnaval 61” van Ommeren a sigura tur hende. Y mientras cu e por a papia na nomber di e fundacion MUSICA, e la duna un indicacion cu aki tambe tin e mesun pensamento. Esta cu si SAC organisa carnaval, no por conta cu fundacion MUSICA tampoco.

Van Ommeren a mustra riba e antiguedad di SAC y a uza como ehempel, con dia aden, dia afo, ta organisa un festival di tumberito of di Prins cu Pancho, siendo cu esaki no ta genera placa. Pero SAC ta sigui organisa esaki sin tene cuenta cu e aspectonan aki. Tambe a mustra cu a logra algo cu SAC no a logra den 60 aña, esta separa e parada di Noord y esun di Luz di ex Tivoli. Mientras cu nan no kier bisa con a logra esaki, nan a sigura cu nan tin e formula y cu polis a gusta e presentacion aki.

Fuera di esey, a mustra cu tin mucho mas cos cu nan a ‘renoba’ di e programa ‘regular’ y ta cla pa implementa esaki ora cu ta asina lew. Di otro banda, nan ta conciente cu tempo no ta na nan banda. “Nos a pasa nos deadline dia bieu” van Ommeren a sigura tur hende. Ne momentonan aki, ya caba ta broma cu e trahenan riba e.o. Facebook. Awe nan ta lew di esey. Pero toch ta haciendo esfuerso pa por logra algo pa carnaval 61. Pero e decision ta simpel. Si SAC organisa carnaval, e 19 gruponan cu ta parti di e ‘Grupo Uni’, no ta participa na carnaval 61. Segun un di e representantenan Kevin James, berdad cu e ta un chens pa musiconan (James ta musico pero tambe lider di grupo di carnaval) genera placa, tin principio cu mester honra. “Bo mester para pa algo. Y esey nos ta haciendo” James a sigui bisa.