A firma MoU pa traha St. Regis Hotel na Palm Beach

PALM BEACH – Na December di e aña aki, desaroyadornan di hotel Desaroyos Hotelco lo pone prome piedra pa e hotel di 5 strea St Regis di 200 camber banda di Rui Antillas (ex Concord). Hunto cu representante di Marriott, e desaroyador Walter Stipa hunto cu gobierno di Aruba diamars mainta a firma un Memorandum Of Understanding (MoU) pa e construccion aki. Ta trata di un proyecto hotelero cu tabata firma caba pa gobierno anterior y cu e gobierno aki a sigui negosha durante ultimo 6 luna pa pone condicionan ‘rigido’ pa e desaroyado segun minister di infrastructura Otmar Oduber. Entre nan segun Oduber a logra convence nan pa reduci e cantidad di camber di 380 camber di timeshare, pa e cantidad menciona di 200 camber transient y 20 residencia. 

DETAYES

E detayes revela ta bisa cu ta trata pues di un hotel 4 strea di 200 camber y 20 residencia,  unda cu lo tin 3 restaurante, spa, piscina y mucho mas y cu e lo ta un inversion inicial di 170 miyon dollar. E intencion ta pa pone e prome piedra den e prome quincena di December pa despues ora cu aña bolter, na januari cuminsa cu construccion di e hotel y aki dos pa 3 aña, habri e hotel nobo aki. A sigura cu lo no haci daño na e naturalesa cu tin aworaki riba e area, cu excepcion di e warda di polis cu lo muda pa un lugar mas mei mei entre high rise y low rise hotel. 

PERMISO

Manera por a spera, tabatin critica cu gobierno ta bolbe traha hotel, y duna permiso. Segun Oduber sinembargo, esaki ta un tereno/permiso otorga masha aña caba. " No ta un permiso nobo. . Awor a logra evita pa e bira un timeshare di casi 400 kamber cu e permiso tawata y a logra reduci e cantidad na 200 anto di calidad 5 Star. Si no a negocia, nan lo a bin cu e timeshare di 400 kambe" Oduber a finalisa bisando.