Comision a haya 3 luna pa evalua fayo di procedura social

ORANJESTAD – Un commission di 2 persona cu gobierno di Aruba a institui pa evalua e procedura social di Aruba tin 3 luna pa raporta bek cu un rapport riba e situacion. Base di esaki ta e situacion recien unda cu cosnan a bay ‘fout’ den aspect social cu a resulta den morto di dos criatura aña pasa. A bin resulta cu varios procedura no tabata sea ‘in place’ of ‘funcionando’ cu a pone cu no por a evita e tragedia di e dos hobencitonan aña pasa. 

CASO TRATA 

Despues cu siman pasa e caso di e dos angelitonan cu aña pasa na november a perde nan bida cruelmente a wordo trata den corte, a crea hopi rabia y indignacion den comunidad. Segun prome minister Evelyn Wever, pa Gobierno di Aruba awo ta importante con hunto nos lo percura pa algo asina no pasa nunca mas na Aruba. Despues di e sucedido tragico aki, a tuma desicionnan y accion di inmediato. Fuera di e commission aki, consistiendo di Magaly Maduro y sra. Hariette Martis, gobierno tin e crisis plan social.  E dos personanan menciona di e commission pa haci e investigacion, tin e experencia amplio den e area social y tin como encargo pa haci un evaluacion di e proceduranan, pa trece na claridad unda e proceduranan den Gobierno a faya causando cu e dos hobennan aki a bira victima di violencia domestico sin cu esnan alrededor di nan a ripara na caminda. 

“Awo Aruba a wordo confronta cu e realidad cu ta trata di dos mucha kendenan tawata wordo abusa structuralmente pa hopi tempo. Esakinan ta cosnan cu nos mester percura den nos sistema pa no socede nunca mas pa cua motibo e investigacion aki ta wordo haci”, Prome Minister a bisa. 

Wever a duna di conoce cu e comision aki a cuminsa traha riba e ‘assesment’ aki y na fin di december lo mester entrega na Gobieno nan rapport cu recomendacionnan di loke cu mester wordo ahusta den nos proceduranan pa por tin mas control y conscientisacion pa raporta e casonan aki na tempo of alerta di riesgonan di casonan di abuso domestico. 

“Abuso di mucha ta causa hopi indignacion y rabia den nos tur. P’esey ta hopi importante pa nos tur sa kico nos como un comunidad mester haci pa algo asina no bolbe ripiti. Unabes cu e ‘assesment’ keda cla, lo publica e rapport aki y Gobierno lo compromete su mes pa e recomendacionnan duna wordo ehecuta y asegura cu tur nos proceduranan ta cana bon”,   Wever-Croes a expresa.