MEP & AVP den un ‘tangana’ pa reparticion di comisionan

ORANJESTAD – E ultimo ‘guera’ entre e partido berde y geel ta conoci, y ta e reparticion di e comisionan permanente den parlamento, principalmente e presidencia y vice presidencia di esaki. Cada aña ta reparti un total di 15 commission fiho entre e parlamentarionan, y ta un practica basa riba ‘custumber’ y ‘cabayerosidad’. Saliendo for di punto di bista di coalicion, nan a reparti y negosha cu oposicion pa haya otro. Aki oposicion na final a opta pa no tuma nada, mirando con ‘coalicion a atende e asunto'. Coalicion ta mustra cu oposicion ta manipula e loke a sosode. Na final, oposicion no a haya ningun presidencia di e comisionan pa e aña aki. 

PROCESO

Segun informacion ricibi, NoticiaCla a compronde cu no tin ningun ley of regla cu ta ‘reglamenta’ den Parlamento ken tin cu haya kico, y ta mas bien un forma di cabayerismo ta con ta regla e asunto aki tur aña. Ningun regla ta existi ken tin cu haya cuanto y pakico. Pa por a determina e proceso, a tene un reunion den commission central, unda cu a negosha y a presenta opcionan pa cada partido. Aki coalicion a ofrece oposicion inicialmente 1 presidencia, y 3 vice presidencia. Algo cu e fraccion berde no kier a tende. E presidencia tabata pa Transporte y Comunicacion, cu ta algo cu e aña anterior oposicion tabatin caba, hunto cu utilidad. E partido berde a pidi pa mantene e mesun di e aña anterior. Un dia despues den e reunion public, fraccion berde a insisti cu nan tabata kier sea 2 of nada. Na final di e reunion, lider di fraccion di MEP (coalicion) Rocco Tjon a ofrece e fraccion berde dos presidencia, esta Transporte & Comunicacion y Husticia. Pero partido AVP a nenga ya cu Husticia no tabata un opcion y a opta e ora pa no tuma nada pasobra nan no tabata di acuerdo cu tanto e reparticion, como e forma cu a maneha e proceso completo. 

INFORMACION

Despues di e reunion, tanto coalicion como oposicion a bay prensa y a duna nan version na e reunion cu a tuma lugar algun rato prome. Aki ta unda cu cos a bira ‘interesante’ ora cu AVP den su comunicado a bisa cu e titular “Presidencianan di comisionan fiho di parlamento kita for di AVP”. Den e articulo, e partido ta papia cu ta’ un dia scur den parlamento’ y cu a ‘purba silencia oposicion door di no duna nan un presidencia’.  Lider di fraccion di MEP esta Rocco Tjon (coalicion), no a gusta e tono aki y mesora a bay prensa y mustra cu esaki ta manipulacion di informacion. “E declaracion cu coalicion lo ta mina democracia, ta condenabel” Tjon a bisa tanto den un comunicado y despues den un conferencia di prensa e siman aki. E ta considere ‘manipulacion’ y cu ‘lo no permiti nungun parlamentario trece mentira dilanti’. “Bo ta trata di engaña pueblo caminda bo kier hacie kom over como si fuera cu no tin democracia” Tjon a bisa. NoticiaCla a purba haya claridad ya cu a bay investiga, y contrario na declaracion di Richard Arends di AVP den nan articulo, coalicion a ofrece e partido berde prome 1 presidencia, y despues den e reunion public 2. Pues debidamente coalicion a ofrece nan un presidencia. Ora cu a puntra Arends (AVP) pa clarificacion, Arends a admiti pero a bisa tambe cu nan a bisa cu nan kier dos of nada. De hecho, segun Arends, nan problema tabata cu e desproporcionalidad relaciona cu e cantidad di asiento cu nan tin. “Henter e uitgangspunt ta robez” segun Arends. Tjon ta pensa otro. “Nan a haya mas presidencia y vice presidencia cu tabatin e aña parlamentario anterior” Tjon a bisa durante e conferencia di MEP dialuna mainta. E ta haya condenable cu ‘dos parlamentario hoben (Richard Arends y Robert Candelaria) ta bin afor y tilde MEP di mina democracia. Arends” AVP ta defende su derecho y pa e presidencia di e comisionan tin ta un mihor refleho di e composicion di Parlamento. Awor esaki no ta e caso”.