SAC ta sigui normal cu preparacion pa carnaval 61

ORANJESTAD – Stichting Arubaanse Carnaval (SAC) ta sigui cu su preparacionnan pa carnaval 61. Si dado caso nan no haya nan permiso di gobierno pa organisa carnaval, tambe nan tin nan plan.” Nos lo cana nos caminda e ora”, presidente di e fundacion, Tecla Kelly a sigura NoticiaCla.com durante un conferencia di prensa diamars atardi, confirmando e noticia previo di NoticiaCla.com, cu ta bisa cu lo hiba gobierno corte si no logra haya e permiso.

Loke si e abogado di e fundacion, Darin Crouch a agrega, ta cu lo tene gobierno responsabel pa e loke pasa despues. Cu esey, nan ta referi na tur e contractonan cu a sera caba, tur e debenan cu tin traha caba y tur esaki ta cay bou di vrijwaring segun Crouch. “No ta nos falta cu no por cumpli cu esaki mas” Crouch a sigura NoticiaCla.com. Pero e fecha pa cual por cuminsa un caso contra gobierno, lo tin cu warda un poco ainda. Ley ta stipula cu unabes cu un instancia haci peticion pa un permiso, e por warda entre 10 dia pa 12 siman prome cu algo keda cla. “Mi no por haci nada prome cu esey” Crouch a sigura NoticiaCla.com. Pero for di declaracion despues di e minister di Cultura di Aruba, Otmar Oduber, e permiso lo no bay pa SAC, pues un caso lo por bin toch prome cu esey.

Pa Tecla Kelly, e problema no a cuminsa awo, sino for di comienso. Segun Kelly, nan a sinti for di un comienso cu nan tabata ‘den minoria’ y cu nan dificilmente lo a ‘gana e bataya’. Nan no ta considera cu minister mester tabata mey mey, debi cu a considera esey como un conflicto di interes. Esaki pasobra e minister indirectamente ta mara na un grupo di carnaval, y tin interes mas aleu den esaki (su casa ta lidera e grupo di carnaval T.O.B).

Durante e conferencia, Kelly a repasa e loke a sosode for di comienso, y a basicamente debati tur loke a wordo bisa den su contra. Pero nada nobo for di e loke cu a keda raporta, no a bin dilanti. Loke si ta un hecho, ta cu SAC no ta entrega, y cu nan ta sigui nan caminda pa organisa carnaval 61. Nan tin dos grupo (segun nan informacion), y un contracto (cu tin valides pa 3 aña mas) ta mara e fundacion MUSICA, pa organisa e festival di Calypso y Roadmarch. De hecho, pa SAC, carnaval 61 ta continua.