Marcha y vigilia teni pa hobencito Justin Fernandes na Merca

AVENTURA – Famia y amigonan di e hobencito Justin Fernandes Pedra a tene un marcha di despedida na Aventura diadomingo atardi. Siman pasa e hobencito di 9 aña a perde su bida ora cu el a bula di e di 12 piso di un edificio, cu intencion pa cay riba un tent. E marcha diadomingo tabata pa amigo y familiarnan na Miami haya chens di despidi di Justin, prome cu transporta e curpa pa Aruba. 

MAS DETAYES

Mientrastanto segun e raportahe di e canal di television mericano Local10 di e cadena ABC, a informa cu autoridad Mericano a considera e loke a sosode, officialmente como un ‘accidente’. E mayornan di Justin durante e momento diadomingo a comparti mas informacion di loke a bisa. Entre nan, a bisa cu e rumannan tabata hungando ‘kak’i sconde’ esta ‘hide and seek’, ora cu nan a logra yega riba e dak di e condominio, for di unda cu Justin a bula cu e fin fatal. “Justin tabata gusta retonan. E tabata gusta ta como ‘spiderman’, y tabata gusta deporte extreme. El a gana e competencia di gocart 20 biaha na Aruba”, e mama Jeantamee Sheuermann a bisa na esnan presente diadomingo atardi. 

E CASO

E hoben Arubiano Justin Fernandes (9) a fayece diahuebs atardi despues di a cay (segun version policial Mericano) di e di 12 piso di e Echo Luxury Condominium na Aventura, Florida. E tabata di vacacion cu su ruman y tata Oldric y su mama, ora cu e accidente a tuma lugar. Informacion cu NoticiaCla a compronde cu tin ta bisa cu su tata a splica cu Justin kier a bay bula riba un lona blauw, for di e top di e edificio, keriendo cu e ta un cusinchi grandi. Lamentablemente e caida a resulta fatal pa e hobencito. Informacion cu NoticiaCla a logra compila ta bisa cu polis di Aventura.

REACCION GOBIERNO

Prome minister Evelyn Wever a manda palabra di convivencia mientrastanto dialuna mainta riba e caso aki durante e conferencia di prensa mainta. El a bisa cu e noticia tristo aki a hala atencion di tur hende, incluyendo gobierno.