DEN HAAG – Recientemente Arubahuis a conclui e proceso di solicitidud pa nombra diferente mentor nobo cu ta keda encarga cu e guia y sosten di nos studiantenan durante nan prome aña di estudio na Hulanda. Esaki ta a base di un desicion mutuo di Gabinete di Minister Plenipotenciario na Hulanda hunto cu Ministerio di Enseñansa na Aruba cu e meta pa restructura y reinforsa e guia y sosten di nos studiantenan. Despues di un proceso largo un comission di solicitud a propone pa apunta 5 mentor nobo pa diferente regio cu hunto cu e mentornan existente lo tin e responsabilidad pa asisti e studiantenan cu a caba di yega Hulanda. Mester menciona cu Arubahuis a ricibi hopi reaccion riba e vacatura cu a keda publica na juli ultimo y a keda hopi contento cu e interes y motivacion di nos profesionalnan Arubano na Hulanda cu kier duna nan aporte na nos hobennan durante e fase nobo aki di nan bida.
E 5 mentornan nobo cu a keda nombra desde prome di september 2018 ta Arubanonan cu ta recidencia na Hulanda y den pasado nan mes tambe tabata studiante di Aruba na madre patria. Cada un por conta awe cu un trayectoria professional y experencia amplio den guia y sosten di hobennan den sea e ramo social of di enseñansa na Hulanda. Como mentor pa e regio di Groningen y Leeuwarden a keda nombra Donna van Heukelem-Kock. Sra. Van Heukelem-Kock actualmente ta docente na Hanze Hogeschool na Groningen. E regio di Arnhem, Nijmegen y Wageningen tambe conoce un mentor nobo den persona di Yuraima Henriquez-Rodulfo. Sra. Henriquez-Rodulfo tin un carera amplio como Maatschappelijk Werker y Wijkcoach den e ciudad di Arnhem. Pa loke ta e regio di Utrecht e mentor nobo ta Omar Besaril. Sr. Besaril ta docente di Natuur- y Scheikunde cu varios aña di experencia den enseñansa laborando na un scholengemeenschap den e provincia di Utrecht. Finalmente e regio di Den Haag, Delft y Leiden, cu porcierto ta e regio di mas grandi, conoce awo dos mentor cu lo ta responsabel pa e guia y sosten di e studiantenan di promer aña. Ta trata aki di Solange Quandus, Onderwijskundige y cu experencia como studieadviseur den enseñansa superior na Hulanda, y Shahaira Brokke, kende ta un psychotherapeut cu specialisacion den “integrale therapie” y cu tin varios aña di experencia cu su propio praktijk na tanto Hulanda como na Aruba. A base di e nombracion di e mentornan nobo Arubahuis a haci un reparticion di e regionnan di e mentornan existente. Swinda Venhorst-Thijssen ta keda como mentor di regio Brabant y Limburg, mientras cu John Dirks ta keda por lo pronto como mentor di regio Rotterdam y Zeeland. Lourdes Bramble-Tromp ta asumi e responsabilidad como mentor pa regio Amsterdam mientras cu Arubahuis ta despidi den e periodo aki di Edy Ranada cu a fungi hopi aña como mentor pa diferente regio.
Den e dianan aki ta tumando lugar encuentronan special pa studiantenan di e diferente regionan pa asina introduci e mentor nobo y tambe pa por despidi di e mentor saliente. Durante di e encuentronan tambe lo toca algun punto di atencion cu e hobennan y lo tin espacio pa atende nan preguntanan y intercambia di experencia.
Arubahuis ta sumamente contento cu a logra reinforsa e team di mentor pa asina por duna mas y miho guia na e studiantenan durante e fase crucial di nan bida y estudio na Hulanda. Ta mira cu e conocemento y experencia di e diferente mentornan nobo y existente ta complementa otro hopi bon y ta cubri e diferente areanan di atencion cu ta hustamente loke nos studiantenan tin mester. Arubahuis ta yama un caluroso bon bini na e mentornan nobo y ta desea nan hopi exito cu e tarea importante pa cu e guia y sosten di nos hobennan na Hulanda.
DEN HAAG - Instituto Hulandes pa Siguridat Públiko (Nederlandse Instituut voor Publieke Veiligheid (NIPV) awe ta transferí tres pòmp mobil di emergensia i nan baki ku slan pertenesiente, na Brantwer di Marina. Dentro di poko tempu nan lo bai pa Kòrsou i Aruba. E sistema di kònteinernan HCP aki ta intenshoná pa kazèrnenan di Marina riba e islanan. Pero Brantwer lokal tambe por hasi uso di nan na momentu di inundashon. Brantwer di Marina i NIPV awe a firma e akuerdo di transferensha.
DEN HAAG – E instituto Real Meteorologico di Hulanda KNMI ta spera un temporada di horcan hopi activo pa 2024. Asina e instituto ta bisa den su raportahe awe riba su porta. E temperaturanan den laman ta hopi cayente cu ta net loke e sistemanan tropical mester pa fomenta e ciclonan den Atlantico y Caribe. “E temperature cayente por tin hopi influencia riba e temporada di horcan di 2024” KNMI ta bisa. “Nos ta spera un temporada di horcan hopi activo mes”.
SCHEVENINGEN – Siman pasa diabierna Minister Geoffrey Wever a haci un bishita na The Pier Skyview na Scheveningen, Hulanda, unda e mandatario a reuni cu interesadonan priva cu a expresa nan entusiasmo pa introduci un atraccion similar na Aruba, specificamente den e ciudad di Oranjestad.
DEN HAAG –Minister Plenipotenciario mr. Ady Thijsen y esposa a tene un recepcion pa celebra Dia di Himno y Bandera na Hulanda. Desde 2015 Arubahuis ta tene un recepcion pa invitadonan for di e mundo politico, embahadornan, functionarionan halto di Estado of di ministerionan cu lasonan estrecho cu Aruba. Tambe miembronan prominente for di e comunidad Arubiano na Hulanda y representantenan commercial y di institutonan di enseñansa tanto riba nivel di HBO como Universidad.
AMSTERDAM – E Conseho di Investigacion pa Seguridad Hulandes (OVV) ta investigando un accidente riba un barco crucero di Holland America Line di siman pasa. Riba e barco Nieuw Amsterdam, cu ta nabega bou di e bandera Hulandes, tabatin un accidente unda cu dos tripulante a fayece. Esaki a sosode den cercania di Bahamas, ora cu algo a pasa den camber di motor. Segun informacion, tabatin un explosion. E barco a sali dia 16 di maart ultimo for di Ft Lauderdale pa un crucero di un siman.
DEN HAAG – E corant Hulandes AD a retira e articulo cu e prominente di partido VVD Hans Hoogervorst ta wak su mes como candidato pa prome minister nobo di Hulanda den e proximo gabinete. “Nos ta ofrece nos disculpa pa e conmocion crea’ e corant ta raporta. Aparentemente un persona a presenta sum es como Hoogervorst y e corant a cay pa e trampa. E motibo di cu nan a revoca e noticia, ta pasobra e ex politico a menasa di cuminsa un investigacion forensico pa cu e forma con e noticia a keda publica. E tabata un periodo caba for di bista como politico, y tabata den pasado ex minister di finanza y salud. Segun Hoogervorst, nunca e la papia cu e corant. E corant sinembargo tabata convenci cu esey tabata e caso si. Pero despues a dicidi pa revoca e noticia toch.