Romero: Lo investiga pa determina causa di candela di bus di Arubus

ORANJESTAD - Lo investiga pa determina causa di candela di bus di Arubus di diabierna mainta tempran. Segun minister di transporte Chris Romero, e tabata un hecho lamentabel y alarmante cu a tuma lugar ora cu un bus di Arubus a pega candela sopresivamente ora cu e tabata riba su ruta acostumbra.

HERIDO

Afortunadamente e bus no tabatin pasahero den dje na momento di e sucedido. E chauffeur a sufri un herida leve na su man ocasiona pa su impulso di purba paga e candela, ora cu esaki a cuminsa origina. E chauffeur ta den perfecto estado di animo y por sigura cu e lo recupera pronto di e herida na su man, pa asina bolbe na su actividadnan regular aki poco tempo.

INVESTIGACION

Inmediatamente despues cu e sucedido a keda registra, Romero a bisa cu el a pidi pa haci un investigacion exhaustivo di e hecho pa asina saca afor kico tabata e causa pa e bus pega candela repentinamente. 

SEGURIDAD

Tambe a pidi pa aumenta e medidanan di siguridad di tur bus door di inspecciona esakinan cuidadosamente prome cu nan subi caminda. E integridad fisico di tur usuario di nos transporte publico mester ta e prioridad principal pa Arubus, y como tal e compania ta trahando diligentemente pa tur cliente por sinti trankil y sigur ora di haci uzo di nan servicio.

FLOTA

Mirando e situacion comprometedor di e flota di bus cu Arubus ta conta cun’e actualmente, e mandatario a recorda cu algun tempo atras el a instrui pa ordo un cantidad di bus pa asina rehubenece e flota actual. Den corto tempo lo cuminsa remplasa e busnan bieu cu tin aworaki, cu busnan mas nobo y eficiente pa asina cumpli cu e demanda di transporte publico cu tin na Aruba.