Prome minister Wever ta comparti e rabia, y indignacion di veredicto caso Speeltuin

ORANJESTAD – E comocion cu e veredicto di e mama di e criaturanan Rishandroh y Eugene diabierna mainta a crea den comunidad di Aruba tabata grandi. Asina grandi cu prome minister di Aruba Evelyn Wever Croes mester a bay publico y trankilisa e comunidad. “Nos di gobierno tambe ta tuma nota di esaki” Wever a bisa. “E frustracion, e rabia, e indignacion cu ta wordo sinti den comunidad, mi ta compartie” Wever a bisa. “Na e momentonan aki nos por wak bek y talvez cada un di nos ta reacciona di otro forma. Bo por culpa e veredicto cu ta mucho abou, bo por culpa e mama cu mester tabata sa miho, bo por culpa e padrastro cu bo ta puntra bo mes ki tipo di hende e ta” Wever a bisa. “Tur esaki ta motibo di frustracion, indignacion y rabia” e mandatario a sigui bisa.

CASTIGO MAS HALTO

Mirando e castigonan cu ta wordo duna, Wever a bisa cu gobierno ta mirando con e castigonan aki por ta mas halto cu ta cumpli segun e grado di seriedad di e crimen cu a wordo cometi. “Nos no ta unda nos mester ta ainda, pero nos ta riba e bon caminda” Wever a sigui bisa. Pero un dia manera awe segun Wever, ta ponebo para keto cu sentimento di rabia cu ta drenta bo curpa. “Loke mi kier pidi comunidad ta, pa haci uso di e momento aki y converti e rabia, e frustracion den energia pa percura pa algun asina no pasa nunca mas” Wever a bisa. Cu esaki e kier men cu nos tur ta responsabel pa loke ta pasa rond di nos. E kier pa ora cu un hende tende algo asina malo, pa raporta esaki mesora. Si e raportahe a sosode manera e mester tabata, nos no tabata den un situacion asina segun Wever. 

NUMBER LIBER

A menciona cu cierto numeronan crucial pa yama pa ayudo, awor a bira liber. Pues no mester di credito riba telefon, no mester di usa carchi di telefon pa yama esaki. Tur ta liber awor cu gobierno a pone na disponibilidad.  “Nan ta pasonan  chikito pero parti di un plan total” Wever a finalisa bisando.