Chaljub: ‘DNA no ta comproba cu mi a mata. Mi a laga e persona bibo’

ORANJESTAD – ‘Mi ta nenga di a mata. Mi no por mata niun hende keri’ tabata e prome palabra di e sospechoso J. Chaljub ora cu huez diabierna a puntr’e pa declara algo den e caso Fist (asesinato na de Vuyst). Un representante di Corte a lesa un declaracion di Chaljub  cu a keda traduci simultaneamente na Hulandes pa e huez y fiscal, mientras cu Chaljub mes tabata sinta keto. Chaljub a cuestiona e hecho cu a haya un di tres DNA (prueba di curpa cu por relaciona un persona cu un caso) di un persona ‘desconoci’. Pues pa Chaljub, ta e persona ey ta esun cu autoridad tin cu busca como e culpable. 

DNA

Den Corte, fiscal a basa su mes hopi riba e cantidad di DNA cu a wordo haya cu ta implica Chaljub como e unico culpable di e caso. Segun Chaljub e hecho cu a haya DNA di dje na e cas, ta pasobra un anochi prome e tabatin relacion (sexual) cu e victima. “DNA no ta comproba cu mi a mata. Mi a laga e persona bibo” e declaracion di Chaljub ta sigui bisa. Segun e sospechoso su declaracion, e ta para ariba cu e no a mata ya cu e no tabata ni na e cas e ora ey. “Mi no a mate, mi no a mate, mi no tabata den e bario di de Vuyst . Mi no tabatin placa pa bay de Vuyst” e declaracion ta sigui bisa. “Si bo mata, mester tin forma pa move” el a sigui bisa, indicando cu e no tabatey. El a sigura cu 100% cu e tabata na cas di su bisiña ‘Weso’. Ademas a pidi pa investiga e caso di su bisiña ‘Weso’ su operacion di su dede, cu tabata prome cu e loke a wordo bisa. Pa un hende compronde, mester sa cu ‘Weso’ (e testigo alibi) lo a declara algo di un operacion cu e lo a haci, pero e tempo no ta cuadra y cu ta pone cu Chaljub tabata na e sitio supuestamente. Segun Chaljub, e cuenta ey no ta cuadra y cu si haci investigacion cu e.o. Hospital, ta haya sa cu loke cu e bisiña a bisa, no ta berdad. Cu e clarificacion ey, e declaracion di su bisiña no ta haya base. 

DI TRES DNA

Loke ta interesante ta e parti di e DNA haya. Fiscal durante su presentacion, a mustra cu tabatin 3 tipo di DNA haya na varios parti di e curpa di e victima Sarahi. Uno di e victima, uno di e sospechoso y un di tres DNA cu tabata desconoci pa autoridad. “Mi abogado a bisa cu tabatin (un) di tres DNA. Bay wak ta di ken. Wak ken e ta. Ami a duna boso mi DNA boluntariamente” e declaracion ta sigui bisa. Ademas, segun Chaljub, e ta mustra cu otro hende culpable lo a huy. “Si mi tabata culpable, mi lo a huy. Mi tabatin suficiente tempo pa huy. Mi no tabata spanta pasobra mi a kere cu boso lo a haya e culpable” el a sigui declara. 

KEDA KETO

Segun Chaljub, el a keda keto pasobra e no tabata sa nada di e caso. Si e papia sinembargo, lo a sali afo cu e tabatin relacion cu e ruman muher menor di edad di e victima, y nan lo a cere pa esey. Pa loke ta e placa cu e lo mester a horta, Chaljub a nenga esaki tambe. E ta nenga cu e ruman a bise di e placa. “E no a bisami cu tabatin placa. Mi no a papia cune!” a sigui bisa. Sinembargo fiscal a mustra cu dado momento a ‘tap’su telefon unda cu nan a intercepta un yamada entre e y e ruman menor. “Mi ta para duro riba mi inocencia. Mi por a horta, mi por a tira atraco, pero mi no a mata. Mi no tin motibo pa mata hende cu mi ta stima” Chaljub a bisa finalmente segun e declaracion lesa.