ORANJESTAD – Fiscal a pidi castigo di bida largo pa e unico sospechoso den caso Fist (asesinato na de Vuyst), diabierna mainta. E sospechoso,- e homber J. Chaljub (47)- , a para ariba for di cuminsamento di e caso cu e ta inocente y cu e no por mata hende cu e ta stima. Na final di e presentacion di e fiscal, el a splica cu e unico castigo cu Chaljub merece y ta responsabel y husto pa duna, ta e castigo di bida largo. E forma con segun fiscal, Chaljub a kita bida di e dama hoben Sarahi Sierra, tabata hopi tristo, a causa famia y comunidad hopi dolor y a laga Aruba den shock. Fiscal a pinta un cuadro dramatico y grafico di con autoridad a haya e curpa sin bida di Sierra dia 3 di November 2017. Fiscal a alerta tur hende den sala cu e descripcion di caso lo ta horibel, pero cu e lo trate na e forma mas respetuoso, mirando con serio y grafico tur cos ta describi.
HUEZ
Na inicio di e caso, huez a opta pa haci un serie di pregunta na Chaljub, riba cual e sospechoso a purba contesta esaki. ‘Mi ta inocente’, Chaljub a bisa huez. “Pakico bo a opta pa awor si papia y tur e tempo bo a keda keto?”, huez a puntra Chaljub. “Esaki pa duna boso chens pa haya e berdadero culpable” Chaljub a contesta. A sigui cu e caso unda cu detayesnan grafico a bin dilanti, pintando un scenario hopi dolorido y tristo (sigur pa e famia) di e ultimo oranan di Sarahi Sierra, prome cu el a fayece. Loke ta mas tristo ta e cantidad di revelacion di e sospechoso cu a bin dilanti, di cual algun fiscal a bisa di no por kere.
TIMELINE
Pa cuminsa, fiscal a presenta un timeline, esta un liña di tempo pa establece kico a sosode y ki ora, usando testimonio di un cantidad di persona, primordialmente esnan cu ta biba den besindario manera bisiñanan. For di e informacion ey, por asumi cu e victim Sarahi lo tabata na bida te cu 9:38 y 10:10 di mainta cu ta e momentonan mas probable cu e actonan horendo a tuma lugar den e cas. Bisiñanan a tende un zonido duro rond di e hora ey, y tambe a scucha algo cu tabata zona manera un gritamento leve, pero suficientemente duro, ya cu bisiñanan a tende esaki hasta cu tur bentana y cortina di e cas cera. Pa 1or y mei di e mesun atardi e ruman chikito di 13 aña a bin haya e ruman grandi morto na cas. E descripcion di con a haya Sarahi, tambe tabata hopi dramatico.
CURPA HAYA
Basa riba investigacion haci y testimonio di e ruman chikito, por compronde cu a haya Sahari den e camber mey mei (e cas tin tres camber banda di otro) riba di dos piso di e cas, mitar suno, cabez tapa y lora den saco di sushi shinishi di Serlimar, mara na conopi. A haya su boca tapa cu tape transparente, nanishi y wowo na sanger, tape y waya di coriente mara rond di su garganta, y hinca di cuchiu na su nek. E tabatin un tshirt bisti pero sin panty y carson. Su pols y enkelnan tabata mara na otro cu tape transparente, dos tipo di veter, y un waya di coriente. Su cabez tabatin herida serio, cu ta considera cu e sospechoso a golpia e cabez cu un hero di strika. For di e informacion di patologo, por deduci cu e sospechoso a viola Sarahi na tino, y a sigui pa mare pa e no move ya cu e lo a purba scapa. Finalmente e sospechoso a chok’e na su nek y mand’e fo’i tino. Despues a pasa un saco di sushi riba su cabez. Loke autoridanan a haya den otro cambernan ta duna un bon indicacion di kico a pasa tambe prome y despues. Por ehempel, den e camber mas lew, e camber di Sahari, a haya un short blauw y panti abou tira, di un forma cu por a saca afor cu a ranka esaki kita nan parew di su curpa. Pues ey e cos a cuminsa. A haya un laken blauw riba cual posibelmente a lastra e victima di un camber pa otro y a bin haye den e camber mei mei. Den e otro camber a haya parti di material cu e sospechoso a usa pa haci su actonan barbarico cune. Corte a establece cu e sospechoso, cu excepcion di un tape transparente posiblemente, lo a bin ‘man bashi’ y a usa material encontra na e cas, pa haci loke el a haci.
PREGUNTA
Varios pregunta tin ainda, manera si Sarahi a haya e sospechoso den e cas ora cu el a drenta mainta despues di a hiba su yiu di dos aña cresh, of si el a habri porta pa e sospechoso. Esaki ta posibel pasobra e victima tabata conoci di e sospechoso y no a haya e porta forza. E sospechoso dado momento den corte a te hasta declara cu e tabatin relacion sexual cu e victima, y cu un anochi prome ainda, e tabata cune y a tene relacion sexual cune. Esey segun e sospechoso, ta splica e sperm di e homber haya na e sitio, riba pianan di Sarahi. E declaracion aki sinembargo no a cay na gusto di fiscal, mirando cu e ta laga un pregunta cu ningun hende no por colabora cune, ya cu e unico hende cu por verifica e storia ey, ya no ta na bida mas, esta Sahari, pues no por defende su curpa. Y e ta laga e famia den mas dolor y pregunta.
MIEDO
Ora cu huez a confronta e sospechoso, e sospechoso a basha abou riba varios cos. Entre nan, cu e motibo cu e no kier a bisa nada anteriormente ta pasobra e ora tur hende lo a haya sa di e relacion amoroso cu e tabatin cu e ruman muher (e di dos) di e victima y mirando cu e ruman ta menor di edad, y lo por a sera e sospechoso pa esey. Eynan e sospechoso a bin basha abou cu e tabatin relacion no solamente cu e ruman menor di edad, pero hasta cu e victima, y un tempo cu e mama di e victima, e tanta ( cu cual e tin yiu) y e bisiña di e sospechoso na unda cu e sospechoso tabata biba na Dakota. Aki cos a bira interesante mirando cu e mesun bisiña aki mester a fungi como ‘alibi’ pa e sospechoso pero cu a bolter e declaracion den su contra. Segun e sospechoso, ta pa nan no haya sa cu e tabatin relacion cune tambe. E situacion a bira full un drama familiar cu a pone hopi hende den corte sacudi cabez.
FAMILIAR
Hopi detayes familiar a bin dilanti, unda cu entre otro a bin sali na cla cu e ruman muher (e di dos) tabatin un relacion cu e sospechoso, te cu el a sake na estado aña pasa y unda cu e baby di 6 luna a nace morto aña pasa. E ruman muher tabatin un relacion asina cera cu e tabata conta e sospechoso tur cos. Hasta a yega asina leu cu e ruman a cuminsa usa droga hunto cu e sospechoso. Y debi na e relacion asina cera, e sospechoso lo a bin haya sa cu tabatin placa den e cas e dia di e asesinato, cu por cierto a desaparece e dia ey. Ta trata di un suma di 1100 florin cu segun fiscal, e ruman a bisa e sospechoso di dje. “E tabata conta e sospechoso tur cos”, fiscal a sigui bisa. Huez ta dicta sentencia dia 28 di September 2018 pa 8:15 di mainta.
ORANJESTAD – Corte Superior otro siman dialuna ta inicia e caso di Avestruz, cu scuchamento di testigo. Mas informacion a bira conoci diamars di kico tur lo sosode specificamente e proximo dos simanan, cu Corte Superior tin reserva pa e caso. E caso mes lo cuminsa dialuna pa 9’or di mainta dialuna 13 di mei. Lo scucha 4 testigo entre 13 y 14 di mei (tin mas pero nan a wordo scucha caba pa Huez Comisario). Despues ta sigui dia 15, 16, y 17 cu repaso di e dossiernan y circumstancia personal di cada sospechoso.
WILLEMSTAD – Dialuna ultimo Hof a celebra su di 155 aña di existencia. Oficialmente sinembargo e fecha ta 1 di mei, pero a dicidi pa combina e celebracion di e dia di liberacion. Den cuadro di esaki, tur establecimento di Hof riba tur e respectivo islanan a ofrece coleganan un almuerzo, prepara pa Koninkrijksbrede Freedom Meals. E almuerzo no solamente a simbolisa e union den Reino, pero tambe e apreciacion intenso pa e diversidad y forza di nos comunidadnan di tur e 6 islanan cu ta cay bou di Hof. Prome cu e almuerzo, Allan van der Ree di WWII Museum Curaçao a tene un lectura na Corsou, y na Aruba e lectura a keda presenta pa Luc Alofs, antropologo cultural. Como parti di e celebracion, Hof a comparti un video cu e mensahe di e presidente di Corte Comun di Husticia, Mauritsz de Kort. Pa wak e mensahe, click AKI.
ORANJESTAD – Corte di apelacion a reserva dos siman di luna di mei 2024 pa trata e apelacionan di caso Avestruz. Specificamente lo tin tres huez pa scucha y trata e 7 sospechosonan. Noticiacla a compronde cu e caso ta cuminsa pa 8:30am tur dia y caba 5’or di atardi. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso. E hecho cu tin dos siman reserva, no kier kier men cu tur dia lo tin caso, ya cu hueznan por programa algo durante e prome dianan y dicidi eynan, con ta usa e dos simanan mas optimalmente.
ORANJESTAD – Corte di apelacion a mantene e sentencia original di expropiacion di ex minister Paul Croes diahuebs como parti di e caso Ibis, cu un cambio si. Envez di paga AWG 183.489,10 bek, e ta haya un reduccion di 20 mil. Pues e mester paga e suma di AWG 163.489,10 mil florin, of sinta un castigo di prison di 18 luna extra di loke e ta sintando aworaki caba. No ta conoci si Croes lo apela, y e abogado Desiree Croes lo a comunica y delibera cu su cliente mas laat awe riba esaki.