Mama di Rishandroh y Eugene sentencia na 3 aña di castigo di prizon

ORANJESTAD -  Huez a sentencia Rishaira Frans, mama di e criaturanan Rishandroh y Eugene na 3 aña di castigo di prizon diabierna mainta, den e caso Speeltuin. Ta kita e tempo cu Frans a sinta den pre aresto, di cual un aña ta condicional cu un tempo di prueba di 3 aña, bou di bista di reclasering. Ademas Frans mester coopera cu tratamento door di un psicologo y psikiatra y Frans no por tin contacto cu e co-sospechoso y nan yiu (esun cu ta na bida ainda), contal cu esaki ta den compania di reclasering.  Fiscal na prome instante a pidi 4 aña ora cu e caso a wordo trata riba e fechanan 15 di juni 2018 y 24 augustus 2018 respectivamente. Comunidad a reacciona hopi rabia y disgusta riba e sentencia. E caso ta trata di e mayornan cu a maltrata nan yiunan di tal forma cu a mata e dos criaturanan aña pasa na Aruba. Prome minister di Aruba Evelyn Wever Croes a haci un declaracion publico pa calma comunidad y 'comberti e rabia  den un energia pa esaki no sosode nunca mas'.

CASO

Frans den e caso Speeltuin tabata sospecha di homicidio y maltrato severo di su dos yiunan chikito. Banda di esey, a sospech'e di a laga e dos criaturanan den un situacion penoso. Huez a conclui cu a wordo proba legalmente cu Frans a haci su mes culpable na complicidad di homicidio y maltrato severo y laga e criaturanan den un situacion penoso.  Segun huez, Frans no a haci suficiente intent pa busca ayudo ora cu e tabata bay trabou. E tabata conoce e risico y no a busca ayudo y como tal no a haci suficiente pa trece su yiunan den siguridad. Como tal, el a duna e oportunidad pa su pareha den su ausencia, causa maltrato di e criaturanan, cu tur risico. Huez ta sali di e punto di bista cu e sospechoso Frans, sigur despues di morto y desaparicion di Eugene, tabata sa di e capacidad di su pareha M. 

RAPPORT

Frans  a wordo trata pa tanto un psiciatra como un psicologo. Huez na e prome tratamento a pidi pa un otro psiciatra independiente di Corsou trata Frans den forma di un ‘second opinion’.  Esaki pasobra e prome raportnan tabata contradi otro fuertemente. E conclusion final segun huez ta cu no tin suficiente prueba cu durante e period di e caso di problemanan cu Frans tabata bon na tino y conciente di loke e tabata haci y por a haci y tabata capaz pa haci. 

CONSIDERACION 

Den e sentencia, huez a tene cuenta cu e sospechoso a perde dos yiu, y cu e tambe wordo maltrata severamente pa su pareha. Tambe a tene cuenta cu e edad hoben di e mama Frans. A deduci di e rapportnan di specialista, cu Frans mester di tratamento duradero pa por drecha di comportacion. Potret cortesia ArubaTopNewsCloud.