AVENTURA –E hoben Arubiano Justin Fernandes (9) a fayece diahuebs atardi despues di a cay (segun version policial Mericano) di e di 12 piso di e Echo Luxury Condominium na Aventura, Florida. E tabata di vacacion cu su ruman y tata Oldric y su mama, ora cu e accidente a tuma lugar. Informacion cu NoticiaCla a compronde cu tin ta bisa cu su tata a splica cu Justin kier a bay bula riba un lona blauw, for di e top di e edificio, keriendo cu e ta un cusinchi grandi. Lamentablemente e caida a resulta fatal pa e hobencito. Informacion cu NoticiaCla a logra compila ta bisa cu polis di Aventura.
POLIS
Segun e canal di television popular di Miami WPLG, un di e polisnan asigna na e scol elementario dilanti di e edificio a core bin algun minuut despues y a cuminsa aplica prome auxilio den forma di CPR riba e hobencito, mientras cu otro polisnan tambe tabata yegando acerca. Asina vocero di e departamento di polis di Aventura, Chris Goranitis a bisa. Segun polis, Justin a fayece na caminda pa Aventura Hospital & Medical Center.
CARTING
Justin tabata hopi conoci den mundo di gocarting y a representa Aruba varios biaha den exterior. E tabata forma parti di Team Paesch na Aruba. Asina cu e noticia di su morto a plama, mensahe di condolencia a cuminsa drenta tur riba rednan social, y ta momentonan hopi conmovedor. NoticiaCla ta manda palabra di profundo condolencia pa famianan di Justin. Cu Justin sosega na paz. Potret ta di facebook.
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.
LOS ANGELES – Conocido personahe Mericano O.J. Simpson, a fayece na edad di 76 aña di cancer. Asina su famia a anuncia diahuebs. E tabata rondona pa su yiunan y nietonan. Na februari, Simpson a keda diagnostica cu cancer di prostaat, y tabata den cuido di hospice durante su tratamento di kimoterapia. E tabata hopi famoso pa su logronan como futbolista americano (rugby) durante 11 temporada. Pero e ta mas ‘conoci’ ainda pa e caso legal unda cu a culpe pa asesina su ex casa Nicole Simpson na 1994. E la keda absolve di e cargo ey, pero despues a drenta prizon toch pa otro cargonan di robo di memorabilia.