Arends: Proceso pa aboli AVV a tarda y no por culpa gabinete anterior pa esey

ORANJESTAD – Ta e proceso pa aboli e ley di Aruba Vrijgestelde Vennootschap (AVV) a tarda, y no por culpa gabinete anterior pa esey. Asina ex minister di gabinete Mike Eman II y actual parlamentario Richard Arends a bisa NoticiaCla diahuebs reaccionando riba e noticia di menasa di OECD pa pone Aruba riba lista preto (blacklist). E actual parlamentario ta considera e reaccion di gobierno di e menasa di blacklist como un excusa pa desacredita e gobierno anterior. Berdad gobierno anterior no a elimina e ley di AVV manera OECD a puntra, pero esaki tin su motibo segun Arends. E ley ta canando su caminda y no a keda cla pa pasa den e gabinete anterior. E hecho cu ta minister mes mester a bay, tambe no ta na su lugar segun Arends, y ta mas un show pa mustra cu gobierno anterior no a cumpli, y mustra malo. 

ELIMINA AVV

Segun Arends, e punto di AVV tabata mas tanto den e ambito di Financial Action Task Force (FATF). Eynan e eliminacion gradualmente di e AVV tabata forma parti di e cambio di ley di nos codigo civil y tambe e wetboek van koophandel. “Y esaki ainda ta pendiente den Parlamento. Gobierno tin tur tools pa pusha esaki y pa introduce esaki via un ‘invoerings verordening’ y esey no a tuma lugar ainda” Arends a bisa. Envez di opta pa hacie, ta opta pa bay crea un impression politico den un reunion tecnico cu mi no ta kere cu ta na su lugar” Arends a bisa di e biaha di minister Xiomara Ruiz Maduro. “E ta un falta di respet pa e instituto di e ministerschap. Den e organisacionan aki bo no tin ministerial meetings, (sino) bo tin tin technical meetings y ta masha unlikely cu un minister ta bay un reunion tecnico” Arends a sigui bisa.

PROMESA INCUMPLI

Ora cu a bolbe puntra Arends pakico e gabinete cu e tabata forma parti di dje, no a cumpli cu e promesa na OECD pa aboli e ley, Arends a bisa cu e cambio di ley a wordo debidamente presenta den e cambio di codigo civil. “E AVV’nan ta un rechtvorm cu nos conoce di empresa y esey a wordo hinca den e cambio di e codigo civil, cu recientemente a pasa Parlamento” Arends. Pues no por culpa gobierno anterior cu no a finalisa e proceso di eliminacion di e ley di AVV.