‘Duiker’ malo a tarda trabou atrobe riba Watty Vos Boulevard

ORANJESTAD – Minister di infrastructura Otmar Oduber a confirma diahuebs mainta cu enberdad tanto DOW como e compania Mota Engil no a cumpli cu e promesa haci algun luna pasa cu ‘dentro di 6 luna’ e trabounan na comienso di Watty Vos Boulevard lo ta complete. A priminti cu pa augustus esaki lo mester a keda cla, pero despues a bisa cu ta fin di augustus.        NoticiaCla a confronta e mandatario cu awor ta mitar di September y nada ainda. E mandatario a admiti cu a contrae mas problema pa cual mester di 2 siman mas (fin di September) pa awor si completa e trabounan. 

KICO A PASA

Oduber a confirma e observacion di NoticiaCla cu tin un ‘duiker’ banda di Kooyman, cu no tabata responsabilidad di e contratista pa atende cune, cu no ta den un condicion optimal. A cera e caminda comienso di augustus pa ‘drecha e parti di afsfalt pa por a habri e caminda, pero a bin nota e duiker (Caminda cu tin cu laga awa pasa bou di caminda). “A tuma un decision e ora pa atende cu e duiker aki di biaha. As we speak, mi a caba sali di DOW cu Mota. E expectation ta cu enberdad nos ta un luna laat, y pa fin di September full e caminda cu duiker ta cla y cu caminda por wordo habri” Oduber a bisa. 

PAKICO NO A CONTROLA ESAKI

NoticiaCla a cuestiona e mandatario con ta posibel cu no por a detecta esaki (duiker malo) durante preparacion pa e trabou y ta awor na final ta bin nota esaki cu ta causa otro retraso. Segun Oduber su contesta, ta trata di ‘lessons to be learned’, esta lesnan cu ta siña na caminda, ora cu tin proyectonan asina. “Ta proyectonan cu Aruba no a atende na e magnitude aki. DOW a reconoce cierto momento cu tabata falta expertisio y conocemento pa por atende cu e ehecucion di un Proyecto grandi asina” Oduber a bisa. Pesey a pone fondo comienso di aña pa por pone mas hende disponibel pa caba e trabou mas liher. Ta un contract cera hopi tempo caba cu no a premira esaki.